Tags-Ghar

pattharoñ meñ bhī zabāñ hotī hai dil hote haiñ
apne ghar ke dar-o-dīvār sajā kar dekho

jo milnā chāho to mujh se milo kahīñ bāhar
vo koī aur hai jo mere ghar meñ rahtā hai

shahzādī ke hijr meñ likhhe kuchh lafzoñ kī hairānī
shahzādī ke ghar tak aate mai-ḳhānoñ meñ gūñjtī hai

ka.ī aise bhī raste meñ hamāre moḌ aate haiñ
ki ghar aate hue apne ko akasr chhoḌ aate haiñ

ḳhisht-dar-ḳhisht aqīdat ne banāyā jis ko
abr-e-āzār usī ghar pe Thaharne ko hai

qāmat-e-dilkash libās-e-surḳh meñ thī mehmāñ
mere ghar ik surḳh maḳhmal kī parī kal raat ko

ashkoñ meñ sulagtī huī ummīd ko dekho
paanī se agar ghar koī jalte nahīñ dekhā

har-dam mire dil hī ko jalātī raheñ aaheñ
ghar ġhair kā lekin kabhī jalte nahīñ dekhā

ishq-e-ḳhāna-ḳharāb tere ba.ad
koī ābād ghar rahegā kyā

havā.eñ zor kitnā hī lagā.eñ āñdhiyāñ ban kar
magar jo ghir ke aatā hai vo bādal chhā hī jaatā hai

rusvā.iyoñ ne ghar kī vo sar hī jhukā diyā
yuuñ shahar meñ vo ūñchī imārat nahīñ rahī

sail-e-girya kī badaulat ye huā ghar kā haal
ḳhaak tak bhī na milī bahar-e-tayammum mujh ko

ujāḌo mire dil ko yā phir basāo
mirī jaan is ghar ke muḳhtār tum ho

ik galī ke nuur ne tārīk kitne ghar kiye
vo na lauTā shaḳhs biinā āñkheñ le kar jo gayā

kaise mileñ ham tum se yaaro kaise bulā.eñ ghar apne
ġham hī ġham haiñ paas hamāre koī ḳhushī kī baat nahīñ

na aao is taraf ai hazrat-e-ishq
chale jaao ġharīboñ kā ye ghar hai

kahtī hai ye shaam kī narm havā phir mahkegī is ghar kī fazā
nayā kamra sajā na.ī sham.a jalā tire chāhne vaale aur bhī haiñ

ik sāhib jo soch rahe haiñ pichhle ek pahar se
yuuñ lagte haiñ jaise bachcha ruuTh aayā ho ghar se

laa.e churā ke bahar-e-parastish butoñ ko ghar
vīrān chaar roz meñ but-ḳhāna ho gayā

kyuuñ bhaTaktī sahrā meñ ghar bhī ik ḳharāba thā
be-nishāñ udāsī kā be-amāñ ahāta thā