Tags-Ghar

kisī kī yaad se dil kā añdherā aur baḌhtā hai
ye ghar mere sulagne se munavvar ho nahīñ saktā

shahr to ba.ad meñ vīrān huā
merā ghar ḳhaak huā thā pahle

tabāhī meñ ga.iiñ dīvāreñ ghar kī
na khiḌkī hī na koī dar gayā hai

vo aa.egā to us se baat hogī
jo ab ke chhuTTiyoñ meñ ghar gayā hai

kaun sā ghar hai javāñ jalvoñ se pur-nūr nahīñ
ik mire dil kī hī duniyā hai jo ma.amūr nahīñ

ye jo mere ghar ke jalne se huī hai chār-sū
log kahte haiñ kaheñ maiñ raushnī kaise kahūñ

ye sard raat ye āvārgī ye niiñd kā bojh
ham apne shahr meñ hote to ghar chale jaate

na koī zaḳhm lagā hai na koī daaġh paḌā hai
ye ghar bahār kī rātoñ meñ be-charāġh paḌā hai

ghar se, kuchh ḳhvāboñ se milne ke liye nikle the ham
kyā ḳhabar thī zindagī se sāmnā ho jā.egā

phir añdherī raah meñ koī diyā mil jā.egā
tum akele ghar se niklo qāfila mil jā.egā

kahīñ hai ijtimā tablīġhiyoñ kā ek koThī meñ
to hai shī.oñ kī majlis aur raqā.im dūsre ghar meñ

ābād kareñ bāda-kash allāh kā ghar aaj
dan jum.a kā hai band hai mai-ḳhāne kā dar aaj

ham apne ghar meñ bhī ab be-sar-o-sāmāñ se rahte haiñ
hamāre silsile ḳhāna-ḳharāboñ se nikal aa.e

'mus.hafī' ghar ke ghar jalā degā
aise ātish-zabāñ ko kyuuñ chheḌā

ghar ke āñgan meñ lagā peḌ kaTā hai jab se
ham tirī baat parindoñ ko sunāne se ga.e

usī shahr kī usī raah par the hamāre ghar bhī qarīb-tar
yūñhī ghūmte rahe umr bhar na to aa.e tum na to aa.e ham

hāl-e-dil kahne ko bārish kī zarūrat hai mujhe
aur mere ghar havā ke dosh par aatā hai vo

bahādur hai amaañ saḌkoñ pe lekin
Darā-sahmā huā sā ghar meñ huuñ maiñ

ghar kā rasta bhī milā thā shāyad
raah meñ sañg-e-vafā thā shāyad

dil se mil kar rahte haiñ
ek hī ghar meñ bārah log