Tags-Ghar

azaab utrā to paañv sab ke zamīñ kī sat.hoñ se aa lage haiñ
havā ke ghar meñ nahīñ hai koī machān paanī meñ bah rahā hai

bas ik savāl hai us ke buland mansab se
qafas-nasīb ko mumkin hai koī ghar de de

apnī ta.abīr ke chakkar meñ mirā jāgtā ḳhvāb
roz sūraj kī tarah ghar se nikal paḌtā hai

raat ik nādār kā ghar jal gayā thā aur bas
log to be-vaj.h sannāTe se ghabrāne lage

vahshī mizāj az-bas mānūs bādya haiñ
un ke junūñ meñ jañgal apnā huā hai ghar sā

daulat-e-duniyā kahāñ rakkheñ jagah bhī ho kahīñ
bhar chuke haiñ apnā ghar be-sāz-o-sāmānī se ham

gar silsila-e-ishq meñ farzand-e-ḳhalaf haiñ
ham ḳhāna-ḳharābī kā ghar ābād kareñge

bahut chhoTā safar thā zindagī kā
maiñ apne ghar ke andar tak na pahuñchā

vo guzartā hai to khulte haiñ darīche ghar ke
ik chamak sī dar-o-dīvār meñ aa jaatī hai

zulf kī hasīñ rāteñ kis pe saya-afgan haiñ
mere ghar tak aa.ī hai bū-e-yāsaman tanhā

'sirāj' ab ghar tirā raushan huā hai
magar vo sham.a-rū mehmān pahuñchā

ro.e jañgal meñ bahut ab jī meñ hai
ghar biThāne ke liye ghar baiThiye

ḳhaak chhānī ishq meñ 'sālik' bahut
pīr-o-murshid koī din ghar baiThiye

zindagī-bhar ek hī kār-e-hunar karte rahe
ik gharauñdā ret kā thā jis ko ghar karte rahe

hamārā ghar hai ki dīvāroñ kī numā.ish hai
koī kivāḌ to kyā is meñ khiḌkiyāñ bhī nahīñ

ghar se bāhar thī na ghar baiThī rahī
soch kī dahlīz par baiThī rahī

jañgal jañgal ghūmne vaalā apne dhyān kī dastak se
kosoñ duur ik ghar meñ kisī ko saarī raat jagātā hai

merī galī ke sāmne vaale ghar kī añdherī khiḌkī meñ
us laḌkī se bāteñ kar ke koī mujhe dohrātā hai

kachchī muñDeroñ vaale ghar meñ shaam ke Dhalte hī har roz
apne dupaTTe ke pallū se koī charāġh jalātā hai

ghar meñ tū daftar kī uljhan
saath na apne laayā hotā