Tags-Ghar

DhūñDh letā maiñ agar aur kisī jā hote
kyā kahūñ aap dil-e-ġhair meñ ghar rakhte haiñ

ghar se rakhte ho qadam kyuuñ bāhar
na mirī jaan nikālo sāhab

rahne do ghar meñ na mujh par nāhaq
rakh ke bohtān nikālo sāhab

taaq par juzdān meñ lipTī duā.eñ rah ga.iiñ
chal diye beTe safar par ghar meñ maa.eñ rah ga.iiñ

ik duur ke safar pe ravāna bhī huuñ 'zafar'
sust-ul-vajūd ghar meñ paḌā bhī huā huuñ maiñ

ik ḳhauf sā bas ghūmtā rahtā hai saroñ meñ
duniyā kā mire ghar se nazāra kare koī

ajab hai zauq-e-tamāshā ki ghar jalā kar log
ye chāhte haiñ samajhnā ki raushnī kyā hai

tū ghar se nikal aa.e to dhartī ko jagā de
tū baaġh meñ jis vaqt lachaktī huī aa.e

tumhārī aarzū ko mil gayā ghar
hamārī hasrateñ be-ghar huī haiñ

āsmāñ par kaale bādal chhā ga.e
ghar ke andar aa.ine dhuñdlā ga.e

ghar kī tanhā.ī jab āñgan ho ga.ī
ye sitāre kyā qayāmat Dhā ga.e

ghar ke har kone se ab bhī
mahak hamārī chunte hoge

havā ke haath meñ ḳhanjar hai aur sab chup haiñ
lahū-luhān mirā ghar hai aur sab chup haiñ

barsoñ meñ ghar ham aa.e to begāna-vār aaj
ham se ḳhud apne ghar ke hī dīvār-o-dar mile

ai 'prem' yuuñ to dhuum thī saare jahān meñ
apne hī ghar meñ koī hameñ pūchhtā na thā

ye pastiyoñ kī lakīreñ na chhū sakeñgī mujhe
maiñ ghar se niklā huuñ āñkhoñ meñ āsmāñ le kar

kyā ab insāniyat mar chukī hai bad-zanī dil meñ ghar kar chukī hai
kuchh samajh meñ nahīñ aa rahā hai kyuuñ hai bad-ḳhvāh bhaa.ī kā bhaa.ī

yaar kā ghar koī kaaba to nahīñ hai 'shā.ir'
haa.e kam-baḳht yahīñ marne ko tū aatā hai

kal jo tū ghar se na niklā uTh gayā kar ke duā
sub.h se tā-shām maiñ kyā intizārī khīñch kar

aa.e hai bekasī-e-ishq pe ronā 'ġhālib'
kis ke ghar jā.egā sailāb-e-balā mere ba.ad