Tags-Ghar

ishq kar ke dekhiye apnā to ye hai tajraba
ghar mohalla shahr sab pahle se achchhā ho gayā

sher-imdād-alī paanī kī amānat ġhasb kiye
apne ghar meñ zanjīr hue baiThe haiñ

ġham bhī sadiyoñ se haiñ aur dīda-e-tar sadiyoñ se
ḳhāna-barbādoñ ke ābād haiñ ghar sadiyoñ se

in ujḌī bastiyoñ kā koī to nishāñ rahe
chūlhe jaleñ ki ghar hī jaleñ par dhuāñ rahe

shahr ujḌe to kyā hai kushāda zamīn-e-ḳhudā
ik nayā ghar banā.eñge ham sabr kar sabr kar

ghar kī zīnat achchhe bachche
mulk kī daulat achchhe bachche

zalzale saḳht aate rahe rāt-bhar
ghar ko dhāte girāte rahe rāt-bhar

vo ghar kare kisī dil meñ to ain mumkin hai
hamārī dar-badarī bhī kisī Thikāne lage

shahr-e-shab meñ kaun sā ghar thā na dī jis par sadā
niiñd ke andhe musāfir ko milā kuchh bhī nahīñ

lutf baḌā ho aur mazā ho is ke evaz gar aap ko paa.eñ
baiTh ke apne ghar ke andar DhūñDh rahe haiñ yaar kā ghar ham

saaya ban kar saath chaleñge saath phireñge saath raheñge
apne ghar meñ ġhair ke dil meñ jaao jidhar tum aa.eñ udhar ham

sab se chhuḌā kar laa.e uḌā kar kyā na rakheñge dil meñ chhupā kar
rahne basne chalne phirne tum ko ḳhudā kā deñge ghar ham

roz na.e dil laa.eñ kahāñ se aise tohfe paa.eñ kahāñ se
chaaT paḌī hai tum ko diloñ kī lūTne jaa.eñ kis kā ghar ham

nashv-o-numā paa.ī hai deccan meñ qadr hamārī kyūñkar hogī
ghar kī murġhī daal barābar kis ko dikhā.eñ apnā hunar ham

banā.e phirte haiñ ham ḳhud ko ḳhush-libās magar
hamāre ghar meñ abhī makḌiyoñ ke jaale haiñ

ghar se nālāñ the magar dekhī hai duniyā ham ne
hai agar koī amāñ-gāh to bas ghar apnā

gūñgā āñgan hai bahrī dīvāreñ
ye ḳharāba hai apnā ghar shāyad

sham.a raushan kisī khiḌkī meñ na thī
muntazir koī kisī ghar meñ na thā

sub.h ke saath jaa.e kaun shaam ko le ke aa.e kaun
raat kā ghar basā.e kaun hai koī jāgtā huā

jism ke andar dil kī bechainī se ye ma.alūm huā
is ghar meñ sab chīzeñ apnī haiñ ye chiiz parā.ī hai