Tags-Ghar

na ghar vaale na ham-sā.e na ahbāb-o-a.izzā haiñ
ye dil hai yā ḳhudā kī zaat jab se tum nahīñ aa.e

ġhubār-e-rāh ne āñkheñ milāne diiñ na dil bhar ke
vo mere ghar jo aayā le ke chashm-e-nīm-bāz aayā

is qadar maiñ ne sulagte hue ghar dekhe haiñ
ab to chubhne lage āñkhoñ meñ ujāle mujh ko

zulmateñ vahshat-e-fardā se niDhāl
DhūñDhtī phirtī haiñ ghar ḳhvāboñ kā

sunte haiñ ki ābād yahāñ thā koī kumba
āsār bhī kahte haiñ yahāñ par koī ghar thā

ghar meñ miTTī kā diyā maujūd hai
raushnī se rābta maujūd hai

umr bhar jañgal meñ rah saktā huuñ maiñ
is meñ ghar jaisī fazā maujūd hai

tabāh vahshat meñ huuñ maiñ dar dar abhī bigaḌ jaa.e ye banā ghar
jo dil meñ rakkhūñ tujhe sitamgar to dil na rakkhe mujhe kahīñ kā

majlis-e-vāz meñ kyā merī zarūrat nāseh
ghar meñ baiThā huā shuġhl-e-mai-o-mīnā na karūñ

ek shab to vasl-e-jānāñ kī tavāzo ai falak
chaar din mehmān tere ghar meñ maiñ be-chāra thā

khilnā kahīñ chhupā bhī hai chāhat ke phuul kā
lī ghar meñ saañs aur galī tak mahak ga.ī

maiñ bharī saḌkoñ pe bhī be-chāp chalne lag gayā
ghar meñ so.e log mere zehn par yuuñ chhā ga.e

hameñ charāġh samajh kar bujhā na pāoge
ham apne ghar meñ ka.ī āftāb rakhte haiñ

ye jo bhiiḌ hai be-hāloñ kī dauḌ hai chand nivāloñ kī
nān-o-namak kā bojh liye jaldī se ghar jaane kā ġham

haath meñ kāġhaz kī liye chhatriyāñ
ghar se na niklā karo barsāt meñ

isī baa.is zamāna ho gayā hai us ko ghar baiThe
vo Dartī hai kahīñ koī mohabbat hī na kar baiThe

bahut ghūmā phirā tū phir bhī ḳhālī hai tirā kaasa
udhar to daulat-e-dil haath aa.ī ham ko ghar baiThe

har sub.h apne ghar meñ usī vaqt jāgnā
āzād log bhī to giraftār se rahe

thā vo ujlat meñ jise karnā thā din bhar kaam aur
ghar meñ bistar par paḌā be-kār bhī ujlat meñ thā

in balā kī āñdhiyoñ meñ ik shajar baaqī rahe
fāḳhtāoñ ke liye koī to ghar baaqī rahe