Tags-Ghar

raah meñ thak kar kahīñ par baiTh mat jaanā 'shafīq'
ghar kī jānib vāpsī kā ik safar baaqī rahe

raat jañgal kī shahar meñ aa.ī
ghar charāġhoñ se jagmagā.īñ kyā

sotoñ ko pichhle pahr bhalā kyuuñ pukāriye
darvāza khulne kā nahīñ ghar ko sidhār.iye

daraḳhtoñ par parinde bolte haiñ
nikal ghar se ki raste bolte haiñ

havelī ke makīñ to chāhte the
ki ghar hī meñ rahe ye ghar kī laḌkī

udaas udaas ye dīvār-o-dar batāte haiñ
ki jaise raas na ho un ko merā ghar honā

'ḳhusrav' ik aaseb ke Dar se ghar kā ghar sab kiil diyā
phir bhī ik aaseb hai zinda jism kī in dīvāroñ meñ

ham rahe par nahīñ rahe ābād
yaad ke ghar nahīñ rahe ābād

ġhazāl-e-husn ko ghar chāhiye par us ke liye
ḳhud apne aap ko sahrā banānā paḌtā hai

ghar na kiyā dil meñ 'rāshid'
zehn meñ chhāne vāloñ ne

dīvār un ke ghar kī mirī dhuup le ga.ī
ye baat bhūlne meñ zamāna lagā mujhe

hai us ke aks-e-gurezāñ kī jalva-ārā.ī
ab apne ghar meñ raho āstāñ se kuuch karo

ham us ghar kī hifāzat kar rahe haiñ
mire sote hī jheñgur jāgtā hai

dar-ba-dar bhaTaktī hai dasht o shahr o sahrā meñ apnā sar paTaktī hai
ai havā-e-avāra terī hī tarah be-ghar be-amāñ to maiñ bhī huuñ

raat ke sehr meñ hai saarā nagar
apne ghar kā diyā jalā rakhnā

aise ko kahiye koī DāñTe to kaise DāñTe
sāmān ghar kā kyā hai in par to jaan sadqe

kis qadar thā garm naala bulbul-e-nāshād kā
aag phūloñ meñ lagī ghar jal gayā sayyād kā

ab is qadar bhī yahāñ zulm ko panāh na do
ye ghar girā hī na de dast-e-ġhā.ebāna koī

office meñ bhī ghar ko khulā paatā huuñ maiñ
Table par sar rakh kar so jaatā huuñ maiñ