Tags-Greed

vaa.iz na sunegā saaqī kī lālach hai use paimāne kā
mujh se hoñ agar aisī bāteñ maiñ naam na luuñ maiḳhāne kā

jaane kis lālach meñ aa kar sar kā saaya bech diyā
meñh meñ bhīge yaad aayā tinkoñ kā chhappar achchhā thā

agar lālach se jannat ke jahannum kī ye dahshat se
kiye jo umr bhar sajde bhī to ye bandagī kyoñ ho

jaa.ez nahīñ taqāzā lālach burī balā hai
na.are lagā ke tum ne ghar bhar pe zulm Dhaa.e

ġham-o-nishāt mohabbat kī chhoḌ de lālach
har ik se uThte nahīñ ye azaab ye barkāt

lālach abas hai dil kā tumheñ vaqt-e-vāpsīñ
ye maal vo nahīñ ki jise chhoḌ jaa.eñ ham

taḳht kī ḳhvāhish luuT kī lālach kamzoroñ par zulm kā shauq
lekin un kā farmānā hai maiñ in ko jazbāt likhūñ

vaa.iz kare hai nekiyāñ lālach meñ huur kī
tab hī to us kī baat hai tāsīr ke baġhair

jhaTak kar dil se saare lobh lālach
yahāñ ban-bās meñ behtar rahā huuñ

vo to ḳhud-ġharzī hai lālach hai havas hai jin kā
naam is daur ke insāñ ne vafā rakkhā hai

in.aam ke lālach meñ likhe mad.h kisī kī
itnā to kabhī koī suḳhan-var nahīñ girtā

in laboñ ke bose ke lālach meñ jaltā hai bahisht
sun le 'uzlat' kaan dhar kahtā hai huqqa guḌguḌā

us ne dukh saare zamāne kā mujhe baḳhsh diyā
phir bhī lālach kā taqāzā hai kahūñ kuchh kam hai

harjā.iyo har ek siiñ lālach nahīñ hai ḳhuub
hai bhiik maañg khānā bhalā is kasab setī

lālach batā ke duur se vaa.iz kā rañg dekh
ḳhālī hī kyuuñ na ho koī botal uThā to lā

ishq-bāzī pe sunā mujh ko malāmat na karo
haif hai jis ko na ho tum se hasīñ kā lālach

dil bhī do jaan bhī do zar bhī do us ko 'parvīñ'
baḌh gayā sab se mire māh-jabīñ kā lālach

mujh ko duniyā kī tamannā hai na diiñ kā lālach
haa.e lālach hai to ik māh-jabīñ kā lālach

na maiñ duniyā kā talabgār na uqbā kī havas
āsmānoñ kī tamannā na zamīñ kā lālach

boriyā taḳht-e-sulaimāñ se kahīñ behtar hai
ham ġharīboñ ko nahīñ tāj-o-nagīñ kā lālach