Tags-Aashob

hañgāma-e-qayāmat taaza nahīñ jo hogā
ham is tarah ke kitne āshob kar chuke haiñ

vasl-e-mau.ūd se āshob-e-tamannā hai adam
be-tamannā tirā āshufta-e-hijrāñ na huā

aisā āshob-e-zamāna hai ki Dar lagtā hai
dil ke mazmūñ hī na ash.ār meñ gum ho jaa.eñ

naqsh-e-pā terā hai gar tū nahīñ ai hashr-ḳhirām
ik na ik bā.is-e-āshob-e-jahāñ hai to sahī

ajab āshob-e-irfāñ meñ
fazā gum bhī ki jī royā

maiñ thā shā.ir mujhe shahr-āshob likhne the likhtā rahā
terī qismat meñ likhe ga.e kyuuñ khañDar sundarī fāḳhta

sakūñ kahāñ ki maiñ āshob-e-fikr rakhtā huuñ
jo mahr thā to tamāzat mirā nasīb bhī thī

na laa.e kuchh bhī ham āshob-e-dahr meñ 'aḳhtar'
bas ek hausla-e-iztirāb le aa.e

aisā āshob to pahle kabhī dekhā na sunā
bhiiḌ galiyoñ meñ hai log apne makānoñ meñ nahīñ

shahr kā shahr hai āshob kī zad meñ so yahāñ
kis ko fursat hai ki dekhe haq-o-bātil kī taraf

ġham haiñ āshob-e-ḳhudī meñ hameñ varna ik shahr
ḳhuuñ se tar shor se ābād hamāre liye hai

rahm hai us kā hī āshob-e-qayāmat kī dalīl
jis se bezār hai vo us ko ḳhatar kuchh bhī nahīñ

khā gayā insāñ ko āshob-e-ma.āsh
aa ga.e haiñ shahr bāzāroñ ke biich

qayāmat kar ke ab ta.abīr jis ko kartī hai ḳhilqat
vo us kūche meñ ik āshob sā shāyad huā hogā

āshob-e-mohabbat kā aañsū rakhtā hai talavvun fitrat meñ
āñkhoñ meñ rahe to qatra hai Tapke to samundar ho jaa.e

ham ne āshob ke aalam meñ kahī hai ye ġhazal
so ye ḳhvāhish hai ki har sher gul-e-tar ho jaa.e

āḳhir is daur-e-pur-āshob kā har aadmī
ḳhvāb-e-mustaqbil ke jañgal meñ bhaTak kar so gayā

mausam badle phir bhī hai āshob-e-visāl-o-hijr vahī
haal zamāne kā jab ye ho kyā maazī kyā haal kareñ

umañDtī yādoñ ke āshob se meñ vāqif huuñ
ḳhudā kare kisī sūrat vo bhuul jaa.e mujhe