Tags-Aashob

ik ajab āshob hai kyuuñ bastiyoñ meñ jalvagar
kyā ye har insān se ḳhauf-e-ḳhudā le jā.egā

usī se aa.e haiñ āshob āsmāñ vaale
jise ġhubār samajhte the kārvāñ vaale

jab gila āshob-pardāzoñ kā us but se kiyā
bol uThā shoḳhī se chashm-e-fitna-zā thī maiñ na thā

ek maiñ huuñ ki is āshob-e-navā meñ chup huuñ
varna duniyā mire zaḳhmoñ kī zabāñ boltī hai

shahr-āshob meñ aañsū kī tarah phirte haiñ
haa.e vo log kisī ḳhvāb ke paale hue log

āshob-e-dahr o fitna-e-mahshar liye hue
pahlū meñ ya.anī ho dil-e-muztar liye hue

dahr āshob hai savāloñ kā
aur ḳhudā lā-javāb hai so hai

dard-e-āshob ḳhalish shabnam-o-taskīñ 'ehrām'
ban ke mahlūl sar-e-chashm numūdār hue

ye bhī achchhā huā tum is āshob se apne sarsabz baazū bachā le ga.e
yuuñ bhī kū-e-ziyāñ meñ lagānā hī thā ham ko apne lahū kā shajar yā aḳhī

afsurda na thā aisā ki juuñ āb-zada ḳhaak
āñdhī thī balā thā koī āshob-e-jahāñ thā

uTho zamāne ke āshob kā izāla kareñ
ba-nām-e-gul-badnāñ ruḳh sū-e-piyāla kareñ

ḳhurshīd vahāñ ham ne sulagte hue dekhe
kirnoñ kā jis āshob meñ bevpār chale hai

is tarah zamāna kabhī hotā na pur-āshob
fitnoñ ne tirā gosha-e-dāmāñ nahīñ dekhā

qahr-e-ḳhudā ḳhudāoñ ke haiñ qahr kū-ba-kū
āshob-e-shahr meñ na duhā.ī sunā.ī de

har har saañs havā amrit ras meñ yā Duubī bas meñ
vasl ho yā āshob-e-judā.ī sab ke saath chalo

ai aah dil se uTh kar lab par hai kyā ta.amul
jā shorish-e-zamīñ ho āshob-e-āsmāñ ho

maiñ na ġham-ḳhvār-e-shahanshā na talab-gār-e-kul
mujh pe kis vāste āshob-e-qayāmat utrā

kyā raat ke āshob meñ vo ḳhud se laḌā thā
ā.īne ke chehre pe ḳharāsheñ sī paḌī haiñ

āshob-e-ḳhisht-o-ḳhāk se jī ko amaañ kahāñ
phir us pe rañg-e-shīsha-e-pindār dekhnā