Tags-Haalaat

ye alag baat ki ham ḳhud hī farāmosh kareñ
kaun kahtā hai ki hālāt sañvar jaate haiñ

hālāt ko har har mauqa.a par ik bhes badalnā lāzim hai
kāñToñ meñ dāman ban jaa.eñ phūloñ par shabnam ho jaa.eñ

mujh ko ḳhāmoshī-e-hālāt se Dar lagtā hai
ye mujhe daur-e-siyāsat kā asar lagtā hai

kuchh aur masā.il mirī jānib hue maa.il
kuchh aur harā ho gayā hālāt kā jañgal

aise hālāt meñ ham dil ko talab karte haiñ
faisla rakh ke jahāñ aql nahīñ kar sakte

duniyā ke hādsāt se bhī rakh tū vāsta
hālāt ghar ke kaise haiñ is kī ḳhabar bhī rakh

jo sochūñ maiñ hālāt apne vatan ke
ragoñ meñ se ristā hai ḳhuuñ jān-e-jānāñ

shaah aur begam kī bāteñ ho chukī hoñ ḳhatm to
kījiye hālāt ke maare hue joker kī baat

be-ḳhauf havāoñ kā abhī zor hai qaa.em
mausam kī tarah badleñge hālāt kisī din

gardish-e-hālāt se māyūs honā kufr hai
umr bhar insāñ ko qismat āzmānā chāhiye

mere us ke biich jo hālāt kī dīvār hai
mujh ko us dīvār meñ ik dar banānā chāhiye

yuuñ bhī hotā hai kisī pal ki mozāhim hālāt
raah de dete haiñ dīvār nahīñ bhī hote

ashk ko aañkh kī dahlīz pe laayā na karo
dil ke hālāt zamāne ko batāyā na karo

raat ke lamhāt ḳhūnī dāstāñ likhte rahe
sub.h ke aḳhbār meñ hālāt behtar ho ga.e

paimāna ba-kaf baiTh ke maiḳhāne meñ saaqī
ham gardish-e-hālāt ko Thahrā.e hue haiñ

bagūle bahut haiñ mirī ghaat meñ
ghirā huuñ ajab dasht-e-hālāt meñ

dil ko hasrat hai tire milne kī
aur hālāt pe qaabū bhī nahīñ

mujh ko hālāt ne behis hī banā kar chhoḌā
mere siine meñ ye dil hai ki dhaḌaktā bhī nahīñ

ab ham ko āvāz na do
ab aise hālāt nahīñ

phuul kāñToñ meñ tū ne dekhā hai
mujh se hālāt-e-pesh-o-pas mat pūchh