Tags-Haalaat

ik haal ho to yaaro us kā bayāñ kareñ ham
kyā kyā na āshiqī meñ hālāt kāTte haiñ

be-his dīvāroñ kā jañgal kaafī hai vahshat ke liye
ab kyuuñ ham sahrā ko jaa.eñ ab vaise hālāt kahāñ

kisī kī bazm ke hālāt ne samjhā diyā mujh ko
ki jab saaqī nahīñ apnā to mai apnī na jaam apnā

sub.h kaisī hai vahāñ shaam kī rañgat kyā hai
ab tire shahr meñ hālāt kī sūrat kyā hai

mere hālāt ne yuuñ kar diyā patthar mujh ko
dekhne vāloñ ne dekhā bhī na chhū kar mujh ko

ab badalnā hī paḌegā ye tarīq-e-zindagī
ab mirī jaañ sūrat-e-hālāt-e-duniyā aur hai

maiñ badalte hue hālāt meñ Dhal jaatā huuñ
dekhne vaale adākār samajhte haiñ mujhe

chalne kā hunar kab aatā hai jab tak koī Thokar khaao nahīñ
hālāt badalte rahte haiñ hālāt se tum ghabrāo nahīñ

vādī-e-qalb ke hālāt tumheñ kyā ma.alūm
kiyā sitam dhāte haiñ jazbāt tumheñ kyā ma.alūm

sar-barahna bharī barsāt meñ ghar se nikle
ham bhī kis gardish-e-hālāt meñ ghar se nikle

andāza-e-hālāt thā pahle hī se mujh ko
darpesh jo ab hai vo mire pesh-e-nazar thā

kis qadar zulm hai hālāt kā 'nūrī' sāhab
aap dhokā mujhe deñ aur maiñ dhokā na kahūñ

husn ġhamze se chhuTā ishq farāmosh huā
aise hālāt meñ kyā sher bhī sachchā na kahūñ

shu.ūr shahr ke hālāt kā nahīñ sab ko
bayān shahr ke hālāt kā zarūrī hai

chāhā mire hālāt ne paiham use kahnā
lekin na huī pyaar kī lau kam use kahnā

sīnoñ meñ soz-o-sāz-e-mohabbat nahīñ rahā
duniyā rahīn-e-gardish-e-hālāt ho ga.ī

gardish-e-hālāt se hai band jin kā nātiqa
vo zabān-e-hāl se lete haiñ bekārī kā naam

ujḌe hue logoñ se gurezāñ na huā kar
hālāt kī qabroñ ke ye katbe bhī paḌhā kar

kisī ko aaj ke hālāt par qarār nahīñ
hamāre shahr meñ sab ḳhvāb kal ke dekhte haiñ

mujh pe TuuTī jo siyah-rāt batāne kī nahīñ
ya.anī ye gardish-e-hālāt batāne kī nahīñ