Tags-Haalaat

apnī bātoñ ke zamāne to havā-burd hue
ab kiyā karte haiñ ham sūrat-e-hālāt pe baat

ḳhvāboñ ke tilismāt se ham guzre haiñ
is daur ke hālāt se ham guzre haiñ

Thiik hai dost vahī huuñ maiñ tirā 'rām' magar
ab maiñ hālāt se aarī huuñ mire paas na aa

hālāt ye kahte haiñ ki tum zinda rahoge
palkoñ pe larazte hue ḳhush-baḳht sitāro

dushvār sahī phir bhī koī sulh kā pahlū
hālāt ke bigḌe hue tevar se nikālūñ

jaane palak jhapakne meñ kyā gul khilā.e vaqt
har dam nazar ba-sūrat-e-hālāt chāhiye

dar-ba-dar Thokareñ khā kar na muqaddar badlā
mere hālāt bhī badle to ḳhudā ne badle

jāntā kaun bhalā kaise kisī ke hālāt
vaqt ne biich meñ dīvār uThā rakkhī thī

raaz kī baat to koī bhī nahīñ
arz-e-hālāt se Dar lagtā hai

mohtāt banāyā hogā unheñ hālāt ne apne ghar ke hī
ab apne hī ghar meñ rahte haiñ 'ḳhālid' jo ba-shakl-e-mehmāñ bhī

apne meñ jo ab bhūle se kabhī rāhat kā taqāzā paatā hai
hālāt pe mere kar ke nazar dil mujh se bahut sharmātā hai

ek se hālāt aa.e haiñ nazar har daur meñ
ruk ga.e mere qadam yā vaqt ne gardish na kī

ham se har-chand vo zāhir meñ ḳhafā haiñ lekin
koshish-e-pursish-e-hālāt chalī jaatī hai

nāma-bar bhī hai taraf-dār ab un kā 'anjum'
mere hālāt kī ab un ko ḳhabar kyā hogī

baḌe maze se guzārī hai zindagī maiñ ne
ḳhudā ke fazl se hālāt sāzgār mile

jo bhī nikle tirī āvāz lagātā nikle
aise hālāt meñ ab ghar se koī kyā nikle

jo mahv-e-hālāt nahīñ hai
aisī koī zaat nahīñ hai

hālāt kā ab maiñ huuñ ḳhāmosh tamāshā.ī
bhaa.ī se taḌaptā hai milne ke liye bhaa.ī

dil par nigāh-e-shauq mizāj-e-jamāl par
hālāt-o-vārdāt pe kis ko hai iḳhtiyār

rahe aise hālāt bachpan se jin meñ
'asar' ḳhud kamānā paḌā zindagī meñ