Tags-Haalaat

barf hālāt kī ban jaa.e na poshāk-e-hayāt
itnī to terī tamannā meñ harārat aa.e

hañs paḌtā huuñ jab koī hālāt kā ronā rotā hai
jīvan ko dushvār samajhne vaale mujh se duur raheñ

aise hālāt se laḌ kar jise kuchh banñā hai
puure karne haiñ ka.ī ḳhvāb tamannā hai kuchh

aise hālāt meñ kyā us se gilā kartā maiñ
raat sūraj bhī añdhere meñ milā thā mujh ko

aaj bhī paayā hai un ko bad-mizāj
sūrat-e-hālāt abhī achchhī nahīñ

zinda rahnā hai to hālāt se Darnā kaisā
jañg lāzim ho to lashkar nahīñ dekhe jaate

kuchh ġham-e-jānāñ kuchh ġham-e-daurāñ donoñ merī zaat ke naam
ek ġhazal mansūb hai us se ek ġhazal hālāt ke naam

badlā hai zamāna bas, hālāt nahīñ badle
haq-goī meñ logoñ ko ab bhī to qabāhat hai

vo tum se ḳhafā hai to use jā ke manā lo
kyuuñ aur ḳharāb apne ye hālāt karo ho

jab barmalā kahne kī yahāñ rasm nahīñ hai
phir kis liye tum purshish-e-hālāt karo ho

murjhā ga.ī hai talḳhī-e-hālāt se magar
kam hai ki ham ne yaad ko marne nahīñ diyā

merī tasvīr adhūrī hai abhī kyā mālūm
kyā mirī shakl bigaḌte hue hālāt kareñ

ruḳh pher diyā tund havāoñ kā kisī ne
hālāt se apne koī majbūr rahā bhī

jab se paḌī hai un se mulāqāt kī tarah
aatī nahīñ giraft meñ hālāt kī tarah

munfarid merī tabī.at hai ye hālāt kahīñ
ravish-e-ām ke sāñche meñ na Dhāleñ mujh ko

chhoTe baḌe bure bhale din raat ke liye
har shai hai sirf sūrat-e-hālāt ke liye

dast-e-hālāt pe maktūb sajā kar saare
ahd-e-māzī ke hasīñ baab haiñ taqsīm kareñ

hālāt kī daldal meñ dhañsiī jaatī hai 'mānī'
ab sākit-o-jāmid hai amal koī nahīñ hai

taqdīr ke chehre kī shikan dekh rahā huuñ
ā.īna-e-hālāt hai duniyā terī kyā hai

darpesh aa rahe haiñ vo hālāt āj-kal
apnoñ ko apnoñ par hī bharosa nahīñ rahā