Tags-Haalaat

pech-dar-pech savālāt meñ uljhe hue haiñ
ham ajab sūrat-e-hālāt meñ uljhe hue haiñ

farq miTTī kā hai darveshī o sultānī meñ
varna ye lagte haiñ parvarda-e-hālāt mujhe

merī azmat kā nishāñ merī tabāhī kī dalīl
maiñ ne hālāt ke sāñche meñ na Dhālā ḳhud ko

fankār kā ehsās-e-ziyā-bār thā jis meñ
hālāt ne vo shīsh-mahal toḌ diyā hai

hālāt 'shahāb' aañkh uThāne nahīñ dete
bachchoñ ko magar iid manāne kī paḌī hai

hālāt ke mahbas se nikālo unheñ varna
mar jā.eñge ghuT kar yahāñ ḳhuddār kisī din

lahar ke sāmne sāhil kī haqīqat kyā hai
jin ko jiinā hai vo hālāt se Darte kab haiñ

hālāt par nigāh rutoñ par nazar na thī
jab tak rahe chaman meñ chaman kī ḳhabar na thī

maiñ ḳhud ye chāhtā huuñ ki hālāt huuñ ḳharāb
mere ḳhilāf zahr ugaltā phire koī

yādoñ ke shahr meñ bhī na 'hairat' sukūñ milā
hālāt ne mizāj kuchh aisā banā diyā

ham ahl-e-nazar ho ke bhī kab ahl-e-nazar the
hālāt ko ḳhud se kabhī haT kar nahīñ dekhā

nahīñ ma.alūm jiine kā hunar kaisā rakhā hai
hameñ hālāt ne jaise rakhā zinda rakhā hai

badle hue hālāt se māyūs na honā
insān ke jazbāt se māyūs na honā

kāġhazoñ par muflisī ke morche sar ho ga.e
aur kahne ke liye hālāt behtar ho ga.e

hālāt ġham-e-dil kah na sake aur dard-e-darūñ bhī sah na sake
aañsū jo hisār-e-chashm meñ the palkoñ ke sahāre aa pahuñche

sab tarah ke hālāt ko imkān meñ rakkhā
har lamha use soch meñ vijdān meñ rakkhā

vasl kī raat vo tanhā hogā
us pe hālāt kā pahra hogā

zindagī aise bhī hālāt banā detī hai
log sāñsoñ kā kafan oḌh ke mar jaate haiñ

hālāt itne bigḌe haiñ duniyā ke har taraf
is vāste 'vasīya' kā dil bhī kasak meñ hai

aisā insān ki jis kā koī ġham-ḳhvār na ho
aise insān ko hālāt nigal jaate haiñ