Tags-Hausla

shukr hai terī talab juzv-e-alam hai varna
mujh meñ thā hausla jiine kā na mar jaane kā

bujhte hue is diip kā tum hausla dekho
jo sub.h talak tez havāoñ se laḌā hai

abhī to aap hī haa.il hai rāstā shab kā
qarīb aa.e to dekheñge hausla shab kā

par kaTe panchhiyoñ se pūchhte ho
tum meñ uḌne kā hausla hai kyā

aaj bhī qaum ke sheroñ kā lahū hai tujh meñ
hausla raam kā bhisham kā jigar paidā kar

hausla tū ne diyā dukh kī pazīrā.ī kā
mujh ko andāza na thā zaḳhm kī gahrā.ī kā

zulm ke sāmne ho sīna-sipar
hausla itnā ham-nafas meñ nahīñ

chalne kā hausla nahīñ ruknā muhāl kar diyā
ishq ke is safar ne to mujh ko niDhāl kar diyā

'rabāb' koī dilāsa na hausla maujūd
zabān qufl-shuda dil dayār chup ḳhāmosh

phir na denā ta.ana-e-nākāmī-e-zauq-e-nazar
hausla hai kuchh to aa jaao nazar ke sāmne

manzileñ laakh kaThin aa.eñ guzar jā.ūñgā
hausla haar ke baiThūñgā to mar jā.ūñgā

TuuT jaane tak uḌeñge ham 'niyāz'
hausla itnā to bāl-o-par meñ hai

'nasīm' un ko jo apnā jazb-e-ḳhātir is taraf laayā
gale mil mil ke ro.e hausla dil kā nikal aayā

hausla de de ke ūñchā merā sar us ne kiyā
zulm ke aage mujhe sīna-sipar us ne kiyā

jism ke barfāb meñ āñkheñ chamaktī haiñ abhī
kaun kahtā hai ki us kā hausla shal ho gayā

nākāmiyoñ se kam na huā hausla mirā
Thokar lagī to aur sambhaltā chalā gayā

haqīqateñ to aTal haiñ badal nahīñ saktīñ
magar kisī kī tasallī se hausla huā hai

kyā diin ko quvvat deñ ye javāñ jab hausla-afzāñ koī nahīñ
kyā hosh sambhāleñ ye laḌke ḳhud us ne sambhalnā chhoḌ diyā