Tags-Hausla

ye kis maqām pe tanhā.ī sauñpte ho mujhe
ki ab to tark-e-tamannā kā hausla bhī nahīñ

tirī taraf se laḌūñgā maiñ terī har ik jañg
rahūñgā saath magar hausla nahīñ dūñgā

itnī āsānī se gar tujh ko ḳhudā mil jā.egā
phir to terī vahshatoñ ko hausla mil jā.egā

terī chāhat ne itne kiye haiñ sitam
zaḳhm sahne kā bhī hausla na rahā

hamāre dil se uThī hausla-shikan āvāz
magar ye paañv kī zanjīr tak nahīñ pahuñchī

jaur se ghabrāne vaale ham nahīñ haiñ dekhiye
hausla kab tak javāñ rahtā hai charḳh-e-pīr kā

badal Daalā nizām-e-jān-o-dil ko
ye sab mere junūñ kā hausla hai

aziyyat raat khāne meñ parosī muflisī ke saath
'hiyā' kā hausla phir saath meñ khānā zarūrī thā

ik lahar us kī aañkh meñ hai hausla-shikan
ik rañg us ke chehre pe bahkāne vaalā hai

maiñ āñdhiyoñ ke paas talāsh-e-sabā meñ huuñ
tum mujh se pūchhte ho mirā hausla hai kyā

thak ke baiThā thā ki manzil nazar aa.ī mujh ko
hausla dene lagī ābla-pā.ī mujh ko

maiñ ne bhī batāyā ki mirā hausla kyā hai
tevar to bahut tez the tūfān-e-balā ke

kahūñ kyā ki dasht-e-hayāt meñ rahā silsila vo sarāb kā
kabhī hausla hī na kar sakī mirī aañkh dariyā ke ḳhvāb kā

jo duā māñgī hai auroñ hī kī ḳhātir māñgī
hausla aaj mire dast-e-duā kā niklā

ishq kā josh sahī hausla ye ham meñ kahāñ
un se kuchh arz kareñge sar-e-bāzār ġhalat

qāmat-e-jānāñ se kartā hai akaḌ kar ham-sarī
hausla dekhe to koī sarv-e-be-buniyād kā

ba-nām-e-ahd-e-rifāqat bhī ham-qadam na huā
ye hausla mire ma.asūm ham-nafas meñ na thā