Tags-Hausla

dekhte haiñ āsmāñ ke ḳhvāb to sab
hausla lekin pighaltā jā rahā hai

aañkh uThā kar unheñ dekhiye kis tarah
sar uThāne kā bhī hausla jurm hai

kisī ko qurb-e-musalsal kā hausla na huā
misāl-e-dūd-e-pareshāñ ham apne ghar meñ rahe

hausla ho to ai ġham-e-jānāñ
kaun terā nahīñ tamannā.ī

shikāyat kareñ kyā shikāyat se kyā ho
agar jañg lāzim hai to hausla ho

piiTh meñ jo chubho gayā ḳhanjar
koī kam-hausla adū hogā

shauq ko be-adab kiyā ishq ko hausla diyā
uzr-e-nigāh-e-dost ne jurm-e-nazar sikhā diyā

ye adāvatoñ kī subuk havā use sah sakūñ kahāñ hausla
maiñ vo peḌ huuñ ki mohabbatoñ kī fazā meñ phūlā-phalā huā

kaun kahtā thā ki ye bhī hausla ho jā.egā
'mīr' o 'ġhālib' se hamārā silsila ho jā.egā

nāla-kashī raqīb se merī tarah muhāl hai
dil nahīñ hausla nahīñ zohra nahīñ jigar nahīñ

girafta-dil the magar hausla na haarā thā
girafta-dil meñ magar hausle bhī ab ke ga.e

kahte haiñ ab hai shauq mulāqāt kā mujhe
jab hausla rahā hī nahīñ baat kā mujhe

tū apnī fat.h kā ailān kar maiñ haar ga.ī
vo hausla ki mujhe jis pe maan thā na rahā

na āñsuoñ kī ravāñ nahr aañkh se karnā
ab us kī yaad bhī aa.e to hausla rakhnā

hamārā hausla hai zindagī se
laḌe jaate haiñ kushtī maat vaalī

zarā sī baat pe āñkheñ barasne lagtī haiñ
kahāñ se DhūñD ke lā.ūñgā hausla baabā

piirī meñ shauq hausla-farsā nahīñ rahā
vo dil nahīñ rahā vo zamāna nahīñ rahā

Daal dī jis ke hausle ne sipar
vo tunak-ārzū jiyā kyā hai

baġhair us ke ho ehsās-e-zindagī kā safar
ye sochtā to huuñ par hausla nahīñ hotā