Tags-Hausla

bahār aate hī kunj-e-qafas nasīb huā
hazār haif ki niklā na hausla dil kā

hausla thā koī maqsad yā salīqa, us ko
vaqt ke tund thapeḌoñ meñ sambhalte dekhā

phir mujhe hausla-e-arz-o-bayāñ mil jaa.e
kuchh dinoñ ke liye mujh ko bhī zabāñ mil jaa.e

kahā us ne ki tum bhī aur logoñ kī tarah se ho
kahā maiñ ne tumhārā hausla bhī āzmānā hai

shabnam ba-dosh aa ke mujhe hausla bhī de
bād-e-sabā kī tarah mujhe chhū kabhī kabhī

zaḳhm khāte haiñ aur muskurāte haiñ ham
hausla apnā ḳhud āzmāte haiñ ham

lashkarī gaañv pe shab-ḳhūn nahīñ māreñge
hausla gasht pe kal raat se niklā huā hai

vo rūThtā hai kabhī dil dukhā bhī detā hai
maiñ gir paḌūñ to mujhe hausla bhī detā hai

hausla haar duuñ 'jalāl' agar
kaam saare muhāl ho jaa.eñ

apne hī fan kī aag meñ jalte rahe 'shamīm'
hoñToñ pe sab ke hausla-afzā.ī rah ga.ī

hausla rah gayā vafā kā mujhe
vo kabhī mā.il-e-jafā na huā

vo ziina ziina mire dil meñ yuuñ utartā gayā
maiñ rok paatī use mujh meñ hausla kab thā

vo utar ga.e the jo paar ḳhud mujhe biich bahr meñ chhoḌ kar
thā jo un meñ itnā hī hausla mujhe Dūbtā bhī to dekhte

ise maiñ aur ye merā asā hī tai karegā
ye rāh-e-ishq mirā hausla hī tai karegā

tirī sub.h-e-aish hai kyā balā tujhe ai falak jo ho hausla
kabhī kar le aa ke muqābla ġham-e-hijr-e-yār kī shaam se

kam-hausla hai koī mohabbat meñ to phir kyuuñ
be-kār girāñ-bār kiyā jaa.e kisī ko

ab to buland aur zarā hausla karo
patthar jo mel ke the vo dīvār ho ga.e

nahīñ maiñ hausla to kar rahā thā
zarā tere sukūñ se Dar rahā thā

phir to us ke sāmne jaise koī rasta na thā
jītne vaalā kabhī yuuñ hausla haarā na thā

nahīñ hai hausla mar mar ke zinda rahne kā
to kaun kahtā hai jiine kī aarzū kiije