Tags-Aasman

hindiyoñ kā nishān hindī hai
auj meñ āsmān hindī hai

kaise Tahaltā hai chāñd āsmān pe
jaise zabt kī pahlī manzil

terī hastī āsmān-e-tark kā māh-e-tamām
tū mohabbat har nafas terā mohabbat kā payām

tire āsmān kā sar kabhī kisī aur zamīn pe jhuk gayā
ye huā to aisā huā hī kyuuñ kabhī us kamī kī talāsh kar

jo is zamīn pe rahte the āsmān se log
kahāñ ga.e vo mire saare mehrbān se log

bhalā ye fan hai ke hāsil riyāz se ho jaa.e
kabhī to koī duā āsmān tak pahuñche

vo ghaTā āsmān par uTThī
uzr ab mujh ko mai-kashī meñ nahīñ

rafāqatoñ kā mirī us ko dhyān kitnā thā
zamīn le lī magar āsmān chhoḌ gayā

jab āsmān zamīñ par utarne lagtā hai
to zindagī kā tasavvur bikharne lagtā hai

ai āsmān tere ḳhudā kā nahīñ hai ḳhauf
Darte haiñ ai zamīn tire aadmī se ham

yuuñ jo taktā hai āsmān ko tū
koī rahtā hai āsmān meñ kyā

parinda qaid meñ kul āsmān bhuul gayā
rihā to ho gayā lekin uḌaan bhuul gayā

ye raaz roz koī faash kar hī detā hai
zamīn ḳhud meñ sameTe hai āsmān bahut

kuchh bhī samajh na pāoge mere bayān se
dekhā bhī hai zamīñ ko kabhī āsmān se

karnā hai apne ġham kā izāla bhī ḳhud hameñ
bārish na hogī amn kī ab āsmān se

maiñ us makān meñ muddat se qaid thā ki jahāñ
koī zamīn na thī koī āsamān na thā

panjoñ ke bal khaḌe hue shab kī chaTān par
nāḳhun se ik ḳharāsh lagā āsmān par

mirī uḌaan agar mujh ko nīche aane de
to āsmān kī gahrā.ī meñ utar jā.ūñ

qismat meñ jis ke thā vo gayā is jahān se
ham ko gila nahīñ hai koī āsmān se