Tags-Aasman

hazār us ko vahī rāste bulāte haiñ
qadam qadam vo nayā āsmān chāhtā hai

bhuuk se bharī āñkheñ
āsmān kī jānib

māyūs ho ke dekhnā kyā āsmān ko
uḌne kā shauq hai to mirī jaañ nikāl par

maiñ āsmān se TuuTā huā sitāra huuñ
kahāñ milī thī ye duniyā mujhe ḳhayāl nahīñ

vo kaun āsmān-e-tasavvur hai 'hādia'
merī zamīñ se jis meñ basāyā gayā mujhe

jā-ba-jā jam.a sūrajoñ kī bhiiḌ
maan ai āsmān rahne de

barsāt kā mazā tire gesū dikhā ga.e
aks āsmān par jo paḌā abr chhā ga.e

huā nahīñ hai abhī munharif zabān se vo
sitāre toḌ ke lā.egā āsmān se vo

zamīñ kī baat zamīñ kī zabāñ meñ kahnā thī
ham āsmān se koī kitāb lā na sake

kahāñ hai aisī zamīñ jis pe āsmān na ho
vo kaisā shahr jahāñ ek bhī makān na ho

tumhāre paas ek jañgal hai
jahāñ kahīñ kahīñ āsmān

milā thā raah meñ baiThā jo ek din ham ko
sunā hai jā chukā vo shaḳhs āsmān kī samt

mire muqaddar meñ jo likhā thā nasīb se vo pahuñch na paayā
girā to thā āsmān se kuchh khajūr meñ rah gayā aTak kar

Dhalne lagī hai shaam mire ḳhāk-dāñ kī ḳhair
shoa.la-fishāñ huī hai shafaq āsmān par

ġhubār-e-jāñ se sitārā nikalnā chāhtā hai
ye āsmān bhī karvaT badalnā chāhtā hai

arz-o-samā kī vus.ateñ ab mujh pe tañg haiñ
mujh ko na.ī zamīn nayā āsmān de

aadmī ab kahāñ zamīñ pe rahe
sab farishte hī āsmān ke haiñ

har sar se āsmān kī chhat uTh nahīñ ga.ī
kab tajarbe meñ shahr ye sahrā nahīñ hue

maiñ āsmān-e-mohabbat se ruḳhsat-e-shab huuñ
tirā ḳhayāl koī Dūbtā sitāra hai

vo jism ruuh ḳhalā āsmān hai kyā hai
ki rañg koī ho us se judā nahīñ miltā