Tags-Hijrat

maut bar-haq hai to phir maut se Darnā kaisā
ek hijrat hī to hai naql-e-makānī hī to hai

hijr se hijrat talak har dukh se samjhautā kiyā
bhiiḌ meñ rah ke bhī maiñ ne ḳhud ko tanhā kar diyā

ye hijrat sirf hijrat hī nahīñ hai
hamārī ruuh ke TukḌe hue haiñ

dirham-o-dīnār haiñ in.aam hijrat kā magar
ghar se gar sab hī chale jaa.eñ to ghar dekhegā kaun

rasm-e-hijrat ko ba-andāz-e-digar zinda rakh
itne vīrāñ hoñ magar shauq-e-makānī na rahe

mujh ko aflāk se hijrat kī sadā aatī hai,
aadmī ishq meñ zindān kahāñ dekhte haiñ

bagūlā
hijr-zāda balki hijrat-zād

dasht meñ qaht-e-āb se hijrat-e-tā.irāñ ke ba.ad
sair-pasand-o-tar-nafas abr ke qāfile ga.e

terī yādeñ bhī kar ga.iiñ hijrat
ab to kuchh bhī nahīñ bachā mujh meñ

hameñ hijrat samajh meñ itnī aa.ī
parinda āb-o-dāna chāhtā hai

ye ālam-e-zuhūr hai hijrat-zada 'salīm'
ham bhī dukhī haiñ sirf pareshān tum nahīñ

qissa dohrī shahriyat kā
ek hijrat ne likkhā hai

badalte mausam kī silvaToñ meñ dabī haiñ hijrat kī dāstāneñ
vo dāstāneñ jo sunñe vāloñ kī niiñd kab kī uḌā chukī haiñ

chhoḌ sakte haiñ ye sab sehn-o-dar-o-bām-e-jahāñ
qariya-e-ḳhvāb se hijrat nahīñ ham kar sakte

hijr ke chhoTe gaañv se ham ne shahr-e-vasl ko hijrat kī
shahr-e-vasl ne niiñd uḌā kar ḳhvāboñ ko pāmāl kiyā

is ḳhāk-e-murdā par kise āvāz deñ 'zafar'
hijrat ham aise logoñ pe vājib hai shahr meñ

ab bhī anjān zamīnoñ kī kashish khīñchtī hai
ab bhī shāyad hai lahū meñ kahīñ hijrat zinda

girte hue pattoñ kī sadā.eñ mire dil se
kahtī haiñ ki tū ne koī hijrat nahīñ dekhī

sab parinde kar ga.e hijrat 'nabīl'
kaun baiThe sāya-e-ashjār meñ

phir na.ī hijrat koī darpesh hai
ḳhvāb meñ ghar dekhnā achchhā nahīñ