Tags-Hijrat

ek hijrat jism ne kī ek hijrat ruuh ne
itnā gahrā zaḳhm āsānī se bhar jā.egā kyā

mire paañv ke nīche bhī zamīñ hai
mujhe hijrat kā koī dukh nahīñ hai

ham lipTe hue ghar se bhī rahte nahīñ lekin
hijrat kā koī ḳhauf bhī taarī nahīñ rakhte

ghultā rahā hai merī ragoñ meñ bhī koī zahr
lekin maiñ is dayār se hijrat na kar sakā

phoḌ kar sar tire dar par yahīñ mar jā.eñge
ham tire shahr se hijrat nahīñ karne vaale

hai ek dāna-e-gandum kī fitna-sāmānī
yahī hai nukta-e-āġhāz apnī hijrat kā

tumhāre sāmne manzar kahāñ qayāmat kā
azaab sahte kabhī kaash tum bhī hijrat kā

vasl-o-hijrat ke ta.iiñ ek samajh 'afrīdī'
aql hai kuchh bhī agar sohbat-e-rindān meñ aa

dasht-navardī aur hijrat se apnā gahrā rishta hai
apnī miTTī meñ shāmil hai miTTī kuchh sahrāoñ kī

kuchh is qadar the havās gum-sum ki vaqt-e-hijrat
bilakte bachchoñ ko pyaar maiñ ne nahīñ kiyā thā

khulā dar chhoḌ aa.e the ki hijrat kā taqāza thā
vahāñ kyā lauT kar jaa.eñ Thikāna bhī nahīñ hogā

mujhe bhī lamha-e-hijrat ne kar diyā taqsīm
nigāh ghar kī taraf hai qadam safar kī taraf

dard-e-hijrat ke satā.e hue logoñ ko kahīñ
sāya-e-dar bhī nazar aa.e to ghar lagtā hai

jo maiñ bhī aag meñ hijrat kā tajraba kartā
muhājiroñ hī meñ hotā vahāñ shumār mirā

log haiñ tayyār hijrat ke liye is shahr se
phir koī taaza nayā farmān jaarī kījiye

dar-o-dīvār pe hijrat ke nishāñ dekh aa.eñ
aao ham apne buzurgoñ ke makāñ dekh aa.eñ

kyā kisī shaḳhs kī hijrat meñ jalī haiñ rāteñ
kyuuñ sharāroñ se chamakte haiñ sitāre shab ke

maiñ ne kahā thā ġhaar meñ kāTeñ hijrat-rut kī pahlī rāteñ
us ne kahā thā us ke biloñ meñ saañp aur bichchhū chhupe hue haiñ

hākim-e-vaqt ye hijrat mujhe manzūr magar
dam-e-ruḳhsat mujhe sāmān-e-safar bhī denā

hijrat ko tum naql-e-makānī kahte ho
hijrat kā mar jaanā matlab hotā hai