Tags-Hunar

ahl-e-hunar ko dekh rahā huuñ ġhamīñ 'nushūr'
duniyā hunar hai raas bhī aa.e hunar ke ba.ad

kaif-e-jāñ nūr-e-basar yaad aayā
arsa-e-harf-o-hunar yaad aayā

jo baat sukūt-e-lab tak hai us se na ulajh ai jazba-e-dil
kuchh arz-e-hunar kī laag rahe kuchh mere junūñ kā kaam chale

izzat zamīr mehnat dānish hunar mohabbat
lekin kabhī bikā hai kore ghaḌe kā paanī

kam haiñ aise jo kareñ arz-e-hunar mere ba.ad
aaj ġhamnāk se haiñ ahl-e-nazar mere ba.ad

azīz-tar hai tesha-e-hunar ġhubār-e-dard se
tarīq-e-qais par nahīñ tarīq-e-koh-kan pe huuñ

'tūr' vo chāhe to sarsabz mujhe bhī kar de
mo.ajaza dast-e-hunar-var meñ bahut hotā hai

is jahāñ meñ sifat-e-ishq se mausūf haiñ ham
na karo aib hamāre hunar-e-zātī kā

hañsnā āh-o-fuġhāñ se sīkhā hai
ye hunar bhī jahāñ se sīkhā hai

likkhī ġhazal to ḳhuub magar ye zarūr hai
paḌhnā tab is ko 'sehr' jab ahl-e-hunar hoñ jam.a

aa.e na kaam ek bhī be-yārī-e-nasīb
go zaat meñ kisī ke hazāroñ hunar hoñ jam.a

kabhī ai ilm o hunar ghar thā tumhārā dillī
ham ko bhūle ho to ghar bhuul na jaanā hargiz

kisī kī aib-jūī hī kiyā kar
abhī ke daur meñ ye bhī hunar hai

hunar kā haq to havā kī bastī meñ kaun degā
idhar maiñ apnā diyā jalā luuñ yahī bahut hai

shiddat-e-karb meñ hañsnā to hunar hai merā
haath hī saḳht haiñ zanjīr kahāñ Dhīlī hai

huī barbād pas-e-be-hunrāñ
sa.ī-e-arz-e-hunar-e-be-āvāz

hameñ ḳhabar thī tirī tarz-e-bādshāhī se
hunar-varo.v ko hī be-iḳhtiyār honā thā

chalne kā hunar kab aatā hai jab tak koī Thokar khaao nahīñ
hālāt badalte rahte haiñ hālāt se tum ghabrāo nahīñ

tumheñ charāġh bujhāne kā zo.am hai lekin
hameñ tulū-e-sahar kā hunar bhī aatā hai

likhūñ zaḳhm ko phuul dil ko chaman
nahīñ mujh meñ aisā hunar hī nahīñ