Tags-Hunar

qadr hai merī qadr-e-ilm-o-hunar
kyā zamāne meñ dūsrā huuñ maiñ

havā ke ruḳh ko badalnā agar nahīñ mumkin
havā kī zad pe safar kā hunar bhī rakhnā hai

auroñ kī burā.ī ko na dekhūñ vo nazar de
haañ apnī burā.ī ko parakhne kā hunar de

har bazm kyuuñ numā.ish-e-zaḳhm-e-hunar bane
har bhed apne dostoñ ke darmiyāñ na khol

ajiib tarz-e-hunar par aḌe haiñ log yahāñ
banāo siikh rahe haiñ bigāḌ karte hue

na thī haal kī jab hameñ ḳhabar rahe dekhte auroñ ke aib o hunar
paḌī apnī burā.iyoñ par jo nazar to nigāh meñ koī burā na rahā

supurdagī ke taqāze kahāñ kahāñ se paḌhūñ
hunar ke baab meñ paikar tirā kitāb huā

tū ilm-o-hunar se ḳhā.if hai
tū raushniyoñ se Dartā hai

kuchh dekh rahe haiñ dil-e-bismil kā taḌapnā
kuchh ġhaur se qātil kā hunar dekh rahe haiñ

ik hunar paas thā apne so nahīñ ab vo bhī
jo dikhā.ī nahīñ detā hai dikhā dene kā

sau pech-e-rah-e-rāhbarī thā ki maiñ jis se
apne hunar-e-rāhravī se nikal aayā

pattharoñ meñ kahīñ to hai vo sūrat
jo ahl-e-hunar nikālte haiñ

mulāzim banñā thā kis ko mulāzim ban gayā koī
hunar zer-e-sifārish hai kisī se kuchh nahīñ boleñ

maiñ ye jāntā thā mirā hunar hai shikast-o-reḳht se mo'tabar
jahāñ log sañg-ba-dast the vahīñ merī shīshagarī rahī

chhoḌ 'faqīh' ye honī kā sur anhonī kī taan lagāo
honī meñ hai koī hunar kyā honī ko to honā hogā

ham aib samajhte haiñ har ik apne hunar ko
kyā kījiye majbūr haiñ qismat nahīñ achchhī

anjuman-sāzi-e-arbāb-e-hunar kyā kahiye
un ko vo aur unheñ ahbāb uThā kar le aa.e

kise ḳhabar thī ki phūloñ meñ bhī hunar hai vahī
kis ehtiyāt se kāñToñ se bach ke aa.e the

jo dekhte haiñ vo tahrīr kar nahīñ sakte
ye mere shahr ke ahl-e-hunar kā aalam hai

aate haiñ nazar sabhī hunar-mand
maiñ hī ek saaf be-hunar huuñ