Tags-Hunar

jahāñ ahl-e-nazar ahl-e-hunar kī hukmarānī thī
vahāñ minqār-e-zer-e-par haiñ baiThe nukta-dāñ kyā kyā

'āshufta' sab gumān dharā rah gayā yahāñ
kahte na the ki ḳhāmiyāñ tere hunar meñ haiñ

merā hunar hai ye tirī dariyā-dilī nahīñ
ab tak jo tere dil meñ banī hai mirī jagah

thā miir jī ko izzat-e-sādāt kā ḳhayāl
ham ne suḳhan ko jins-e-dukān-e-hunar kiyā

be-āb ā.inoñ ko bhī ik aab baḳhsh dī
har chand be-hunar the ye kār-e-hunar kiyā

ham bhī Thahre 'mujīb' ek shorīda-sar jab na paayā koī qadr-dān-e-hunar
aap apne junūñ ke sanā-ḳhvāñ hue aap apne parastār bante ga.e

auroñ kī burā.ī ko na dekhūñ vo nazar de
haañ apnī burā.ī ko parakhne kā hunar de

hunar-varī ko na sho.ala na raakh daaġh banā
jo dil meñ lau hai use sher meñ charāġh banā

ye kam nahīñ ki taraf-dār haiñ mire kuchh log
hunar kī varna yahāñ kis ne daad paa.ī hai

be-hunarī ko hunar kare ye ahl-e-hunar kā dushman hai
charḳh-e-kaj-raftār hai āḳhir 'tābish' ham bhī ḳhayāl kareñ

maiñ tahī-dast muflis-o-nādār
tū mujhe dast-e-be-hunar na samajh

bhare haiñ tujh meñ vo lākhoñ hunar ai majma-e-ḳhūbī
mulāqātī tirā goyā bharī mahfil se miltā hai

is se baḌh kar koī in.ām-e-hunar kyā hai 'farāz'
apne hī ahd meñ ek shaḳhs fasāna ban jaa.e

lahū hī kitnā hai jo chashm-e-tar se niklegā
yahāñ bhī kaam na arz-e-hunar se niklegā

naqqāloñ ke pīchhe kyuuñ phirte ho hunar vaalo
dekhā hai kyā sāgar ko sarjū ke ta.āqub meñ

shikast-e-fāsh denī hai man-o-tū ke ravayyoñ ko
marāsim kī bahālī kā hunar ījād karnā hai

maiñ hunar-mand-e-rañg huuñ maiñ ne
ḳhuun thūkā hai daad paa.ī hai

har ghaḌī chashm-e-ḳharīdār meñ rahne ke liye
kuchh hunar chāhiye bāzār meñ rahne ke liye

afsurda se chehroñ pe baḌī der se ham log
ik khoyā huā dast-e-hunar DhūñD rahe haiñ

na āsmāñ se na dushman ke zor o zar se huā
ye mojaza to mire dast-e-be-hunar se huā