Tags-Hunar

ab is qadar bhī na kar justajū-e-āb-e-baqā
gul-e-hunar hai to bād-e-fanā bhī raas aa.e

sar-e-ihāta-e-ġham raat bhar sañvarnā thā
tirī judā.ī meñ kār-e-hunar bhī karnā thā

ba.ad muddat ye jilā kis ke hunar ne baḳhshī
ba.ad muddat mire ā.īne meñ chehre aa.e

rañgoñ ko baratne kā hunar siikh chukā huuñ
kyā chāhiye ab terī nishānī ke alāva

ilm hunar aur fan to ab matrūk hue
khoTe sikke chalte haiñ bāzāroñ meñ

sochte hī rahe pūchheñge tirī āñkhoñ se
kis se sīkhā hai hunar dil meñ utar jaane kā

maiñ bachchoñ kī nazar se dekhtā huuñ chāñd meñ thālī
magar chashm-e-hunar se māh-pāre dekh letā huuñ

lahū se harf tarāsheñ jo merī tarah ummīd
unhīñ ke hisse meñ zaḳhm-e-hunar bhī aatā hai

hai sarāhā ḳhuub ye paivand-kārī kā hunar
rishta-dar-rishta sabhī ab pech khole jā.eñge

hai jigar kis kā jo is teġh-e-hunar kī daad de
apne hāthoñ zaḳhm khā kar apnā jauhar dekhiye

us ko maz.hab kaho yā siyāsat kaho
ḳhud-kushī kā hunar tum sikhā to chale

be-hunar honā bhī goyā hai hunar
raaz ye tāḳhīr se jaanā gayā

dho ke tū merā lahū apne hunar ko na chhupā
ki ye surḳhī tirī shamshīr kā jauhar hī to hai

naaz bhalā kis baat kā tujh ko pās-e-hunar jab kuchh bhī nahīñ
manzil par pahuñchegā kaise raḳht-e-safar jab kuchh bhī nahīñ

inhī tārīkiyoñ meñ zinda rahne kā hunar sīkho
diye ko mat jalāo tum havā.eñ nā-munāsib haiñ

karte jo ham kinārā us dānish-o-hunar se
ishrat-garoñ meñ hotā shāyad guzar hamārā

lāla-e-sañg se tarāshe vo koī paikar-e-sañg
dast-e-sanña.a meñ ik ye bhī hunar rakh denā

jis kī ḳhātir maiñ bhulā baiThā thā apne aap ko
ab usī ke bhuul jaane kā hunar bhī dekhnā

muskurāne kā hunar sīkhā hai jab se dosto
mushkiloñ kā hal nikal aayā hai āsānī ke saath