Tags-Hunar

lams-e-sadā-e-sāz ne zaḳhm nihāl kar diye
ye to vahī hunar hai jo dast-e-tabīb-e-jāñ meñ thā

bhalā huā ki ġham-e-āshiqī shi.ār kiyā
vo kyā kare jo kisī bhī hunar meñ taaq na ho

jis samay terā asar thā mujh meñ
baat karne kā hunar thā mujh meñ

jo 'ḳhalish' vāqif na the sher-o-suḳhan ke naam se
aam un logoñ pe 'ġhālib' kā hunar us ne kiyā

kuchh tamāshā.ī bhī lāzim haiñ sar-e-maqtal 'tufail'
vo nahīñ hoñge to qātil kā hunar dekhegā kaun

hunar aaj 'ishqī'-e-be-navā kā ḳhajil hai rūh-e-'sirāj' se
vahī ik ḳhalish jo matā-e-fan thī subūt-e-be-hunarī rahī

uḌ jā.eñge havā meñ sabhī naqsh-e-nā-tamām
aur mausam-e-hunar bhī palaT kar na aa.egā

zindagī kuchh hai 'atā' sher-o-adab hai kuchh aur
ye do-rañgī kī vabā kaisī hunar meñ aa.ī

jis jagah chehra hī meyār-e-vafā Thahrā hai
ḳhaak hī ḳhaak vahāñ dast-e-hunar meñ aa.ī

unheñ fankār ko pahchānñā bhī ḳhuub aatā hai
hunar hai kis ke hāthoñ meñ ye patthar dekh lete haiñ

qadar hunar kī jo huī dekh lī
ab hunar-e-be-hunarī kījiye

fan kī hamāre aaj bhī shohrat hai har taraf
vo mutma.in thā dast-e-hunar kāTne ke ba.ad

to phir vo ishq ye naqd-o-nazar barā.e-faroḳht
suḳhan barā.e-hunar hai hunar barā.e-faroḳht

dil ko hai yaad shauq kā vo hunar
jis se baḌh kar koī kamāl nahīñ

fan ko suulī pe chaḌhāyā gayā fankār ke saath
qarya qarya bikī nāmūs-e-hunar tere ba.ad

shaġhl-e-arbāb-e-hunar pūchhte kyā ho ki ye log
pattharoñ meñ bhī kabhī aa.ine jaḌ jaatī haiñ

uñgliyāñ pahle qalam karnā paḌeñgī 'bābar'
phir ye mumkin hai qalam harf-e-hunar tak pahuñche

mujh ko koī bhī sila milne meñ dushvārī na thī
sab hunar aate the lekin aql se yaarī na thī

vo ḳhush haiñ 'vajd' arz-e-hāl kar le
yahāñ fursat nahīñ arz-e-hunar kī

ishq-bāzī se baaz aao 'hasan'
chhoḌ do apnā ye hunar dekho