Tags-Hunar

ḳhatā ye thī ki maiñ āsāniyoñ kā tālib thā
sazā ye hai ki mirā tīsha-e-hunar bhī gayā

tū āshiq hai vafā terā hunar hai ishq meñ varna
mirā gul be-vafā hai kyā ise qadr-e-vafā bulbul

ba.ad muddat ye jilā kis ke hunar ne baḳhshī
ba.ad muddat mire ā.īne meñ chehre aa.e

aap hī kī hai adālat aap hī munsif bhī haiñ
ye to kahiye aap ke aib-o-hunar dekhegā kaun

amīr-e-shahr mujhe hurmat-e-hunar hai bahut
ye apnā turra-e-dastār ye qabā le jā

lafz kī qaid-o-rihā.ī kā hunar
kaam aa hī gayā āḳhir mere

huī hai shāḳh-e-hunar meñ na.ī numū ab ke
'salīm' barg-e-ḳhizāñ se najāt baaqī hai

mirī ġhazal meñ jab aa.e 'ja.afar' nazar unheñ ma.arke hunar ke
hue mire mo'tarif sab ahl-e-nazar bahut der ba.ad jā kar

jo bā-hunar haiñ un ke qadam chūmte haiñ ham
jo be-hunar haiñ un ke kamāloñ se ishq hai

agar har chiiz meñ us ne asar rakkhā huā hai
to phir ab tak mujhe kyuuñ be-hunar rakkhā huā hai

har ek aib hunar meñ badal bhī saktā hai
hisāb apne gunāhoñ kā kar ke dekh zarā

koī hunar koī qismat nahīñ chalī bhā.ī!
bane haiñ kaam mire haañ meñ haañ milāne se

mire lahū ko mirī ḳhāk-e-nāguzīr ko dekh
yūñhī salīqa-e-arz-e-hunar nahīñ aayā

numūd-e-zauq o bulūġh-e-hunar kā zikr hī kyā
yahāñ ye log to āh-o-bukā meñ rahte haiñ

kījiye hunar kā zikr kyā ābrū-e-hunar nahīñ
sab ke banā.e ham ne ghar aur hamārā ghar nahīñ

ajab masāf sukūt o suḳhan meñ jaarī hai
kise vasīla-e-arz-e-hunar banāyā jaa.e

nāz-bardār-e-hunar ho ga.e ruḳhsat kab ke
ab bisāt-e-suḳhan-o-naġhma-o-ash.ār uThā

aa.egī kaise niiñd dikhā vo hunar use
phir is ke ba.ad ḳhvāb ko chhū kar use dikhā

irtikāb-e-jurm shar kī baat hai
aur barī honā hunar kī baat hai

sulūk dekh liyā be-hunar havāoñ kā
har ek shāḳh hai manzar udaas rāhoñ kā