Tags-Hunar

tumhārī tarah jiine kā hunar aatā to phir shāyad
makān apnā vahī rakhte patā tabdīl kar lete

'pinhāñ' mirī ġhazloñ ko bahut naaz hai us par
tāsīr kī daulat jo milī dast-e-hunar se

lafzoñ meñ utarne kā hunar siikh rahā huuñ
ḳhatre meñ haiñ alfāz ke sīnoñ meñ dafīne

mujhe 'mohsin' is kā gila nahīñ mujhe māl-o-zar jo milā nahīñ
jo hunar suḳhan kā mujhe milā vo kahāñ sabhī ko atā huā

'qaisar' bhī salīb apnī uThā.e hue guzrā
kahte haiñ ki ḳhuddār thā jiine ke hunar meñ

ye raah kitnī pur-āshob hai 'fazā' na kaho
qalam kī raah chale ham hunar kī gard hue

jise guzār ga.e ham baḌe hunar ke saath
vo zindagī thī hamārī hunar na thā koī

vo to hai maḳhsūs ik terī mohabbat ke liye
terā 'anvar' bā-hunar yā be-hunar jaisā bhī hai

junūñ ne mujh se ta.āruf ke marhale meñ kahā
maiñ vo hunar huuñ jise ye jahān bhuul gayā

kauḌiyoñ ke mol bik jā.egā ḳhud us kā vajūd
koī jab bāzār meñ apnā hunar le jā.egā

jins-e-tāza ke ḳharīdār paḌe haiñ har-sū
kaise be-kār mirā harf-e-hunar jā.egā

duniyā ko rauñdne kā hunar jāntā huuñ maiñ
lekin ye sochtā huuñ ki duniyā ke ba.ad kyā

qadmoñ ko Thaharne kā hunar hī nahīñ aayā
sab manzileñ sar ho ga.iiñ ghar hī nahīñ aayā

hunar se jaa.e kisī ke na fan se jaatā hai
lahū kā daaġh kahīñ pairahan se jaatā hai

yaaro dikhāo phir koī aisā hunar ki bas
ġhairoñ kī koī fikr hī ham ko nahīñ rahe

chand sāñseñ haiñ mirā raḳht-e-safar hī kitnā
chāhiye zindagī karne ko hunar hī kitnā

mere aib-o-hunar chhupeñ kaise
maiñ 'navāz' apnī shā.irī meñ huuñ

dosto zarūrat par kaam aa gayā apne
dushmanoñ se sīkhā thā ham ne jo hunar barsoñ

udhar tamām kiyā āsmāñ ne apnā kaam
idhar phañse hue ahl-e-hunar hunar meñ rahe

tum ahl-e-harf ki pindār ke sanā-gar the
vo āsmān-e-hunar ke nujūm sāmne haiñ