Tags-Hunar

ham ahl-e-zarf ki ġham-ḳhāna-e-hunar meñ rahe
sifāl-e-nam kī tarah dast-e-kūza-gar meñ rahe

batā ke aib-o-hunar sher-goī ke 'afqar'
sikhā.ī apne harīfoñ ko shā.irī maiñ ne

mire kār-zār-e-hayāt meñ na koī najīb na kam-nasab
yahāñ naam sirf hunar kā hai yahāñ charche bas haiñ kamāl ke

'fazā' tujhī ko ye saffāki-e-hunar bhī milī
ik ek lafz ko yuuñ be-libās kar jaanā

añdhere 'sahar' tā-nashīñ ho ga.e
ki raushan hai merā hunar har taraf

jo kuchh mata-e-hunar ho to sāmne laao
ki ye zamāna-e-iz.hār-e-nasl-o-rañg nahīñ

sayyād ke hunar kī satā.ish nahīñ ho ab
jis ko hai par nasīb vo uḌtā dikhā.ī de

ham se qabā-e-dard pe taare na Tañk sake
kasb-e-hunar kī taak meñ vāmāñdgī ga.ī

shukr kartā huuñ ḳhudā ne mujhe mahsūd kiyā
ab maiñ samjhā ki mire paas hunar kyā kuchh hai

pahle kabhī to maut ko tujh se gila na thā
jiine kā aaj kaise hunar aa gayā tujhe

ḳhayāl-o-ḳhvāb kī duniyā se istifāda kiyā
hunar samajh ke isī kaam ko ziyāda kiyā

rusvā hue zalīl hue dar-ba-dar hue
haq baat lab pe aa.ī to ham be-hunar hue

rizq bhī be-sabab nahīñ miltā
apne bachchoñ ko be-hunar mat rakh

zabt kar ġham ko ki jiine kā hunar aa.egā
ba.ad patjhaḌ ke bahāroñ kā safar aa.egā

maiñ kaañp kaañp gayā huuñ ba-nāme--sūd-o-ziyāñ
shumār-e-zaḳhm-e-hunar kā javāb aisā thā

sabhī ko sahl-añgārī hunar lagne lagī hai
saroñ par ab ġhubār-e-rahguzar shāyad na aa.e

hamārā jism hai saa.e meñ dhuup sar par hai
baḌe hunar se vo rauzan banā.e jaate haiñ

kis liye 'ramz' itnī ūñchī tum ne kar rakkhī haiñ dīvāreñ hunar kī
dekho apne sāthiyoñ ko rauzan-e-ḳhud-āgahī se sar nikālo

nisā.ī karb likhne kā hunar ham ko hī aatā hai
hukūmat apnī sābit kar rahe haiñ mard kāġhaz par

diyā ilm o hunar hasrat-kashī ko
falak ne mujh se ye kaisī daġhā kī