Tags-Hunar

jihat ko be-jihtī ke hunar ne chhīn liyā
mirī nigāh ko mere hī sar ne chhīn liyā

haañ ham ne bhī paayā hai sila apne hunar kā
lafzoñ ke lifāfoñ meñ baqā sahmī huī sī

ḳhafā tum se ho kar ḳhafā tum ko kar ke
mazāq-e-hunar kuchh fuzūñ chāhtā huuñ

mere liye bhī ḳhvāb the us ne rakhe hue kahīñ
shahr meñ un ko DhūñDne qāsid-e-be-hunar ga.e

markaz-e-ilm-o-hunar mai-kada-e-soz-o-sāz
sajda-e-shauq se ābād hai rindoñ kā haram

rāhat-e-jān-e-'zafar' haiñ shāhidān-e-be-hunar
rauñdne ko un ke qadmoñ meñ hunar rakh dījiye

ik be-hunar huuñ aur hunar chāhtī huuñ maiñ
ab dhuup ke safar meñ shajar chāhtī huuñ maiñ

sunā hai log dariyā band kar lete haiñ kuuze meñ hunar hai ye
magar tum munsifī se ye kaho qatre ko dajla kaise karte ho

baġhaur dekhnā chehroñ kā rañg utarte hue
mire hunar kī chamak aa.ine meñ rakh denā

ye hunar bhī baḌā zarūrī hai
kitnā jhuk kar kise salām karo

kuchh to ho jo tujhe mumtāz kare auroñ se
jaan lene kā hunar ho ki masīhā.ī ho

ḳhud-dārī bhī kachchā shīsha fankārī bhī kachchī niiñd
sab kuchh kho kar ye paayā hai shahr-e-hunar meñ kuchh bhī nahīñ

likhte likhte lafzoñ se merī bhī kuchh pahchān huī
saarī umr kī pūñjī le kar aaj hunar tak aa.ī huuñ

phir hunar-mandoñ ke ghar se be-hunar jaatā huuñ maiñ
tum ḳhabar be-zār ho ahl-e-nazar jaatā huuñ maiñ

arziyāñ kab roknā hai kab baḌhānā
ye hunar daftar ke baabū jānte haiñ

ik roz aisā ho ki charāġhoñ ke rū-ba-rū
kuchh meñ hunar karūñ koī tū bhī kamāl kar

shaboñ ko jāgte ho jis ke ḳhvāb meñ 'akbar'
vo shāhkār kamāl-e-hunar se niklegā

roz marne kā hunar jis ne sikhāyā hai mujhe
us kā ehsān bhulāyā to nahīñ jā saktā

jin ko alfāz se Dasne kā hunar aatā hai
haath ab un se milāyā to nahīñ jā saktā

kuchh na kuchh hote haiñ har shahr meñ fan ke pārakh
qadr hotī hai jahāñ ahl-e-hunar jaate haiñ