Tags-Hunar

sulagtī sā.atoñ kā ḳhauf ab kamzor hai shāyad
vahī sahmā huā dast-e-hunar vāpas bulātā hai

añdhere chiir ke jugnū nikālne kā hunar
bahut kaThin hai magar tū nikāl letā hai

ab is se aur ibārat nahīñ koī saadī
ki merā ḳhaas hunar bhī rahā ḳhudā-dādī

ahl-e-hunar kī baat thī ahl-e-nazar ke saath
ab to koī bhī un kī taraf dekhtā nahīñ

is jahāñ meñ sifat-e-ishq se mausūf haiñ ham
na karo aib hamāre hunar-e-zātī kā

tumhārā sab ham ko jānte haiñ to apnī izzat kī laaj rakh ke
hamārī hastī ke aa.ine ko koī hunar kuchh kamāl denā

shāyad ab rūdād-e-hunar meñ aise baab likhe jā.eñge
sāmne dariyā bahtā hogā log sarāb likhe jā.eñge

nāg-viddyā kā saarā gyaan liye
ham kamāl-e-hunar ke mālik the

kisī tarah bhī to vo raah par nahīñ aayā
hamāre kaam hamārā hunar nahīñ aayā

mujhe shā.irī kā hunar milā mujhe ganj-e-la.al-o-guhar milā
mire harf meñ mire lafz meñ jo hai be-karāñ koī aur hai

tañg-o-mahdūd bahut husn-e-nazar thā pahle
zulf-o-ruḳhsār pe mauqūf hunar thā pahle

'shāz' ko sabr atā kar ke baḌā kaam kiyā
us ne kyā māñgā thā kyā paayā hai ai rabb-e-hunar

harf ko barg-e-navā detā huuñ
yuuñ mire paas hunar kuchh bhī nahīñ

maiñ ne apne chehre par sab hunar sajā.e the
faash kar gayā mujh ko saada pairahan merā

achchhoñ meñ aib bhī ho to dāḳhil hunar meñ hai
rakhtā hai sau banāv tirī zulf kā bigāḌ

ham log to marte rahe qistoñ meñ hamesha
phir bhī hameñ jiine kā hunar kyuuñ nahīñ aayā

'gauhar' ġhazal se dhul to gayā kuchh ġhubār-e-ġham
har chand ye hunar sabab-e-ābrū na thā

sar darīchoñ se nikal aa.e sadā sunte hī
ye hunar tere gadāgar meñ kahāñ se aayā

but banāyā mire hunar ne mujhe
mere hāthoñ ne mujh ko toḌā hai

harīm-e-lafz-o-ma.ānī se nisbateñ bhī rahīñ
magar salīqa-e-arz-e-hunar nahīñ aayā