Tags-Hunar

hunar kaho ki karāmat magar yahī hai ki ham
ḳhushī ko Dhaal bhī sakte haiñ ġham kī sūrat meñ

log samjhe hī nahīñ mere hunar ko varna
mujh meñ fankār thā poshīda maiñ fankār meñ thī

bhīge hue ġham meñ sar se pā tak
dariyā-e-hunar se aa rahe haiñ

mire ḳhudā ye tab-o-tāb-e-saf.ha kaisī hai
jo likh rahā huuñ vo kilk-e-hunar se bāhar hai

ajab fusūn-e-ḳharīdār kā asar hai ki ham
usī kī aañkh se apne hunar ko dekhte haiñ

har kisī ḳhvāb ke chehre pe likhūñ naam tirā
maiñ use apnā hunar samjhūñ ki in.aam tirā

hunar paidā kiyā hai maiñ ne hairat-āzmā.ī meñ
ki jauhar aa.ine kā har palak hai chashm-e-hairāñ kī

ġham kī tashrīh hañsī-khel nahīñ hai koī
pahle insān tū bin phir ye hunar paidā kar

alfāz dil kī aag se mahrūm ho ga.e
jab shā.irī ko sirf hunar kar diyā gayā

chhupā kar apnī kartūteñ hunar kī baat karte haiñ
shajar ko kāTne vaale samar kī baat karte haiñ

pahle hī marhale meñ qalam ho ke rah ga.e
dast-e-hunar ko haath dikhāne nahīñ diyā

raqs-e-junūñ meñ bhī thā tarīq-e-hunar kā Dhab
sūfi-e-bā-safā thā koī yā malañg thā

bashārateñ thiiñ ki poroñ kī samt aatī thiiñ
magar ye haath ki jin meñ hunar nahīñ likkhā

jaise kahīñ hai kuchh kamī tasvīr bantī hī nahīñ
arz-e-hunar meñ kab talak kilk-e-guhar toḌā karūñ

tajraba ham pe taġhāful kā na kiije varna
kuchh hunar ham bhī karishmā.ī liye baiThe haiñ

koī afsāna kisī TuuTī huī mizrāb kā
fasl-e-gul meñ rā.egāñ arz-e-hunar jaane kī baat

charāġh jalte raheñge havā baġhaur ye sun
hunar pe tujh ko abhī dastgāh thoḌī hai

maiñ ne apne parda-e-sher meñ tujhe is hunar se chhupā liyā
ki ġhazal kahī to har ik ġhazal tirī ḳhushbuoñ se bharī rahī

tujhe shauq mere kalām se tujhe pyaar mere hunar se thā
tujhe apnā maiñ na banā sakī yahī merī be-hunarī rahī

jab se sīkhā hai hunar shīshagarī kā maiñ ne
bas usī din se ye duniyā hai ki patthar huī hai