Tags-Hunar

hunar-mand hāthoñ kī miTTī se
maiñ ne banāyā

maiñ ne har haal meñ parvāz kā sīkhā hai hunar
kaT ga.e par mire phir bhī maiñ uqāboñ meñ rahā

us daur meñ aap aa.e the ai hazrat-e-'jāved'
jis ahd meñ kuchh farq na thā aib-o-hunar meñ

jo bā-kamāloñ kī tauqīr kam kare 'shāhid'
hamāre haath koī aisā bhī hunar na lage

dekh 'mārūf' ki us shoḳh ne shab ko yak-dast
tā.ir-e-rañg-e-hinā ko ba-hunar band kiyā

ab mirā saarā hunar miTTī meñ mil jaane hai
haath us ne rakh diye haiñ dīda-e-namnāk par

ye zīnateñ bhī ajab haiñ ye sādgī bhī ajab
riyā ke saare hunar jism par sajā rakhnā

mujh ko baḳhshā hai ḳhudā ne jab ye ġhazloñ kā hunar
mere fan kī phir ghaTā.egā bhalā tauqīr kaun

lab pe harf-e-mo'tabar rakhtā hai vo
baat karne kā hunar rakhtā hai vo

is zamāne meñ jahālat se guzar hotī hai
ab hunar se to koī ghar ko chalāne se rahā

be-hunar haath chamakne lagā sūraj kī tarah
aaj ham kis se mile aaj kise chhū aa.e

kyā kyā na paḌhā is maktab meñ, kitne hī hunar sīkhe haiñ yahāñ
iz.hār kabhī āñkhoñ se kiyā kabhī had se sivā bebāk huā

apne pe kar rahā huuñ qayās ahl-e-dahr kā
samjhā huuñ dil-pazīr mata-e-hunar ko maiñ

zaḳhm kā naam phuul kaise paḌā
tere dast-e-hunar se pūchhte haiñ

sayyad-zāde dil māñgo yā dād-e-hunar
saa.il to har haal meñ saa.il hotā hai

banā ke ā.īna dekhe hai pahle ā.īna-gar
hunar-var apne hī aib-o-hunar ko dekhte haiñ

na ḳhuub o zisht na aib-o-hunar ko dekhte haiñ
ye chiiz kyā hai bashar ham bashar ko dekhte haiñ

are o adīb-e-fasurda-ḳhū are o muġhanni-e-rañg o bū
abhī hāshiye pe khaḌā hai tū bahut aage ahl-e-hunar ga.e

apnā use banā na sakā maiñ tamām umr
mujh meñ bahut hunar the magar ye hunar na thā

hamārā zauq-e-hunar hai sadāqatoñ kā amiiñ
hamāre haq meñ bhalā kaise faisla hogā