Tags-Husn

mad-bhare nain ye aur husn-o-javānī kā nikhār
aa.ina dekh ke aaj aap bhī hairāñ kyuuñ haiñ

log kahte haiñ jise husn-e-adā kī shoḳhī
yahī rañgīn ishāroñ kā bayāñ hotī hai

nuqūsh-e-sajda ko mere hiqārat se na dekho tum
inhīñ sajdoñ kī tābish se hai husn-e-dāstāñ baaqī

ā.īne aarsī to faqat dekhne ke haiñ
dekho tum apne husn ko merī nigāh se

kis shaan se chalā hai mirā shahsavār-e-husn
fitne pukārte haiñ zarā haT ke raah se

safārat-e-had-e-hairāngī pe huuñ māmūr
nigār-ḳhāna-e-husn-o-adā ko jaatā huuñ

ishq hī tanhā nahīñ shorīda-sar mere liye
husn bhī betāb hai aur kis qadar mere liye

tirā jamāl tirā husn kāmgār rahe
vo kyā kare na jise dil pe iḳhtiyār rahe

ye kamāl-e-ishq kī sāzisheñ ye jamāl-e-husn kī nāzisheñ
ye ināyateñ ye navāzisheñ mirī ek musht-e-ġhubār par

jinheñ kahiye ishq kī vus.ateñ jo haiñ ḳhaas husn kī azmateñ
ye usī ke qalb se pūchhiye jise faḳhr ho ġham-e-yār par

jahān-e-husn ke asrār pā nahīñ saktā
jo ishq apnī hadoñ tak hī be-qarār rahe

ḳhirad vāloñ se husn o ishq kī tanqīd kyā hogī
na afsūn-e-nigah samjhā na andāz-e-nazar jaanā

husn kī garmi-e-bāzār ilāhī tauba
aag sī aag barastī hai ḳharīdāroñ par

'adīl' log gharoñ ko sajā.e baiThe haiñ
faroġh-e-husn faqat barg-o-bār karte rahe

husn meñ jab ta.iiñ garmī na ho jī deve kaun
sham-e-tasvīr ke kab gird patañg aate haiñ

husn ke sehr o karāmāt se jī Dartā hai
ishq kī zinda rivāyāt se jī Dartā hai

jis ke husn kī shohrat mujh pe baar guzrī thī
aaj phir vahī laḌkī raah roke Thahrī thī

vo daur merī umr kā thā yādgār daur
jis meñ ki tere husn pe mujh ko ġhurūr thā

ishq jhelā hai to chehra zard honā chāhiye
husn ke shaidā.iyoñ ko mard honā chāhiye

husn ke soz-e-numā.ish kā hai in.ām-e-hayāt
vaqt bhī vaqt na thā shams-o-qamar se pahle