Tags-Husn

sahar kā nuur hai us kī nigāh meñ 'anjum'
zamīñ ke husn ko shādāb karne aayā hai

ab husn kī duniyā meñ bhī ārām nahīñ hai
hai shor sar-e-kū-e-butāñ jāgte rahnā

ham dekheñ kis din husn ai dil us rashk-e-parī kā dekheñge
vo qad vo kamar vo chashm vo lab vo zulf vo mukhḌā dekheñge

vo husn hai insān kī merāj-e-tasavvur
jis husn ko puujā hai mire sher o adab ne

daavā to kiyā husn-e-jahāñ-soz kā sab ne
duniyā kā magar ruup baḌhāyā tirī chhab ne

paik-e-qazā hai dam-ba-dam 'jaun' qadam qadam shumār
laġhzish-e-gām rañj hai husn-e-ḳhirām rañj hai

jalva-e-yār dekh kar tuur pe ġhash hue kalīm
aql-o-ḳhirad kā kaam kyā mahfil-e-husn-o-nāz meñ

ishq kī be-hijābiyāñ husn kī parda-dāriyāñ
hone lagī talāshiyāñ naaz meñ aur niyāz meñ

shauq ne khīch lī mire yaar kī jab naqāb-e-ruḳh
husn kī raushnī huī jalva-gah-e-majāz meñ

ik panāh kyā malī ki husn-o-ishq ke
sab gunāh nekiyoñ kī mad meñ aa ga.e

tere karam se ai alam-e-husn-āfrīñ
dil ban gayā hai dost kī ḳhalvat kabhī kabhī

dekh liije mohabbat kī sarshāriyāñ
husn kā aap to aa.ina ho ga.e

dayār-e-shab kā udaas manzar
tulū-e-husn-e-zavāl tak thā

ye mai chhalak ke bhī us husn ko pahuñch na sakī
ye phuul ghul ke bhī us kā shabāb ho na sakā

kaun sā sho.ala lapaktā hai ye mahmil ke qarīb
husn kis kā hai jo bikhrā hai mire dil ke qarīb

fareb-e-husn nazar kā dikhā.ī detā hai
hameñ har ek jo achchhā dikhā.ī detā hai

ḳharāb huuñ ki junūñ kā chalan hī aisā thā
ki terā husn mirā husn-e-zan hī aisā thā

aabrū husn kī daulat se milī hai tum ko
rañg kundan sā hai zardār nazar aate ho

phuul shabnam shafaq chāñdnī kahkashāñ
parda-e-husn se jhāñktā kaun hai

ḳhudā jaane nizām-e-mai-kada ko kyā huā 'shamsī'
na vo husn-e-atā baaqī na vo lutf-e-nazar baaqī