Tags-Husn

husn vaale to bahut aur haiñ duniyā meñ magar
un ko yakta-e-zamāñ un kī adā ne rakkhā

ab sila husn-e-amal kā kyā milā kyā jāniye
raushnī the ham so sho.ale kī rifāqat meñ rahe

husn-e-be-parda kī garmī se kaleja pakkā
teġh kī aañch se ghar meñ mire khānā pakkā

husn ko sirf vahm hai varna
ishq to bad-gumāñ nahīñ hotā

ye ḳhudā ban ke ri.āyat nahīñ karte haiñ 'vasī'
husn vāloñ ko kabhī qibla-o-ka.aba na banā

nāz-o-niyāz ishva-o-ġhammāziyāñ na siikh
ai husn kah rahe haiñ dil-e-āshiqī se ham

husn ko kar na de ye sharminda
ishq se ye ḳhatā bhī hotī hai

yuuñ husn ke chehre par aa.ī nahīñ barnā.ī
sau shaam ke pardoñ meñ ik sub.h chhanī pahle

shauq se dekho husn-e-yār magar
phir na kuchh dekhnā ho to dekho

husn-e-be-hijāb par koī parda Daal lo
tum use sanam kaho maiñ use ḳhudā kahūñ

husn-e-sūrat pe na jā dekh vahīñ ma.anī ko
ek haiñ ka.aba-o-but-ḳhāna kahāñ hai kuchh aur

ai 'mehr' husn-e-lutf-e-mazāmīñ kuchh aur hai
yuuñ to sabhoñ ne sheroñ se dīvān bhar diye

musalmāñ ke lahū meñ hai salīqa dil-navāzī kā
muravvat husn-e-ālam-gīr hai mardān-e-ġhāzī kā

adā pariyoñ kī sūrat huur kī āñkheñ ġhazāloñ kī
ġharaz māñge kī har ik chiiz hai in husn vāloñ kī

kohsāroñ meñ nahīñ hai ki bayābāñ meñ nahīñ
bāġhbāñ husn faqat tere gulistāñ meñ nahīñ

jo uThā hai dard uThā kare koī ḳhaak us se gilā kare
jise zid ho husn ke zikr se jise chiḌh ho ishq ke naam se

mujhe chāhiye vahī sāqiyā jo baras chale jo chhalak chale
tire husn-e-shīsha-ba-dast se tirī chashm-e-bāda-ba-jām se

use hāl-o-qāl se vāsta na ġharaz maqām-o-qayām se
jise koī nisbat-e-ḳhās ho tire husn-e-barq-ḳhirām se

rāh-e-junūñ pe chal pare jiinā muhāl kar liyā
ham ne talāsh-e-husn meñ ḳhud ko niDhāl kar liyā