Tags-Husn

vahī huā ki takalluf kā husn biich meñ thā
badan the qurb-e-tahī-lams se bikharte hue

vo TūTte hue rishtoñ kā husn-e-āḳhir thā
ki chup sī lag ga.ī donoñ ko baat karte hue

tire husn se mire ishq tak ye jo nisbatoñ ke haiñ silsile
ye shajar haiñ ek hī baaġh ke ye samar haiñ ek hī Daal ke

uThtī nahīñ nigāh kisī samt ai 'sahāb'
kis husn-e-be-badal ke haiñ jalve nigāh meñ

tere jamāl-e-nāz kā husn-e-kamāl hai
ḳhud jalva ban gayā huuñ tirī jalva-gāh meñ

husn-e-sāda kā vaar āñkheñ haiñ
bin tire be-qarār āñkheñ haiñ

kaun samjhegā mire husn-e-yaqīñ kā aalam
arsh o tuubā ko hijābāt-e-gumāñ kahtā huuñ

gar yūñhī aag dāman se uThtī rahī to jalā Dālegī
husn-e-gul-rañg kā pairahan ishq-e-gulnār kī dhajjiyāñ

ho diloñ meñ husn-e-qalandarī ho zabāñ pe na.ara-e-sarmadī
jo hilā de taḳht-e-sikandarī vahī kaj-kulāhī dikhā.iye

husn aur navāzish-e-mohabbat
aisā to kabhī huā nahīñ hai

tujhe haq hai ki tū parda uThā.e rū-e-raushan se
ki tere husn ko aatā hai tahzīb-e-nazar karnā

ye kis ne mirī nazar ko luuTā
har chiiz kā husn chhin gayā hai

badal na jaa.e kahīñ iltifāt-e-husn kā rañg
halāvat-e-nigah-e-muḳhtasar kī baat karo

tumhārā husn kyā hai kyā nahīñ hai
tumheñ ḳhud is kā andāzā nahīñ hai

ham ishq meñ haiñ fard to tum husn meñ yaktā
ham sā bhī nahīñ ek jo tum sā nahīñ koī

husn bhī hai ma.āl-e-kār vabāl
bazm-dar-bazm kyā hai ḳhaar hai sham.a

husn dīvāna sab ko kartā hai
apne hī aap par nisār hai sham.a

us kī sūrat se huuñ sannā-e-azal kā qaa.il
jalva-e-qudrat-e-haq husn-e-bashar hai ki nahīñ

kahiye kyūñkar na use bādshah-e-kishvar-e-husn
ki jahāñ jā ke vo baiThā vahīñ darbār lagā

mohabbat tere sadqe tū ne kar dī vo nazar paidā
jidhar āñkheñ uThīñ hotā hai husn-e-jalvagar paidā