Tags-Husn

husn-e-sulūk-e-yār kā e.ajāz kyā kaheñ
sau daaġh ek dil pe uThā.e hue haiñ ham

vo husn kis qadar adab-āmoz thā 'zahīr'
qad ḳhāma-e-ravāñ thā to chehra kitāb thā

husn-e-sad-rañg se firdaus ba-dāmāñ niklā
ham ne jis phuul ko dekhā vo gulistāñ niklā

ziyā-e-mehr āñkhoñ meñ hai tauba mah-jabīnoñ ke
ki fitrat ne bharā hai husn ḳhud apnā hasīnoñ meñ

azīz-tar haiñ mujhe ḳhud se bhī hasan-chishtī
batā.ūñ aap ko kyā banda-parvarī kyā hai

jañgal kī dhuup chhāñv hī jañgal kā husn hai
sāyoñ ko bhī qubūl karo raushnī ke saath

iztirāb-e-dard meñ had se guzar jaanā nahīñ
husn-e-shām-e-ārzū kā ruup Dhalte dekhnā

huuñ mahv-e-dīd aañkh uThā.ūñ maiñ kis taraf
dekhūñ maiñ kis ko juz tire husn-e-butāñ hai hech

kabhī husn-e-parda-nashīñ bhī ho zarā āshiqāna libās meñ
jo maiñ ban sañvar ke kahīñ chalūñ mire saath tum bhī chalā karo

har e'tibār-e-husn-e-nazar se guzar ga.e
har halqa-hā-e-jāl pe ham raqs kar ga.e

os meñ Duub ke jis tarah nikhartā hai gulāb
sharm se aur sivā husn adā kā niklā

saaqī ke salīqe par husn-e-do-jahāñ sadqe
sayyāroñ kī gardish hai yā daur meñ paimāne

ye kār-e-suḳhan kār-e-abas to nahīñ 'āmī'
ye qāfiya-paimā.ī nahīñ husn-e-bayāñ hai

aalam dikhā rahe haiñ ajab nūr-o-nār kā
jalvoñ ko husn-o-ishq ke yak-jāñ kiye hue

baiThe haiñ bhīgī zulf pareshāñ kiye hue
kāfir adā-e-husn ko uryāñ kiye hue

us kā lahja karaḳht ho gayā hai
aur maiñ husn-e-zan kiye hue huuñ

log un se ye kahte haiñ ki kitne haiñ 'shakīl' aap
us husn ke sadqe meñ mirā naam to aayā

ḳhush huuñ ki mirā husn-e-talab kaam to aayā
ḳhālī hī sahī merī taraf jaam to aayā

husn kāfir thā adā qātil thī bāteñ sehr thiiñ
aur to sab kuchh thā lekin rasm-e-dildārī na thī

koī ġhuncha na pahuñchegā tire husn-e-tabassum ko
sar-e-maidāñ chaman meñ muskurā.e jis kā jī chāhe