Tags-Husn

kisī ke husn kī tasvīr khīñch kar dil meñ
tasavvurāt kī mahfil sajā rahā huuñ maiñ

guloñ ke dām-e-mohabbat meñ aa rahā huuñ maiñ
fareb husn-e-majāzī kā khā rahā huuñ maiñ

abhī to husn-e-amal kā zamāna baaqī hai
vahāñ kī bigḌī huī kuchh yahīñ banā.e chalo

jitne the rañg husn-e-bayāñ ke bigaḌ ga.e
lafzoñ ke baaġh shahar kī sūrat ujaḌ ga.e

husn hai pairahan-e-atlas-o-kamḳhvāb liye
eid aa.ī hai mohabbat kā nayā baab liye

meñ tumhāre husn kā be-sāḳhta iz.hār huuñ
apne ā.īne meñ merā bhī sarāpā dekhte

hasīñ tujh se tirā husn-e-talab thā
maiñ apne aap ko hāsil hī kab thā

kis kī ye mauj-e-husn huī jalva-gar ki yuuñ
dariyā meñ jo habāb the āñkheñ chhupā chale

ek ik adā-e-husn-e-gurezāñ nazar meñ hai
pāmāl ho rahe haiñ baḌī be-ruḳhī se ham

vāqif kab thā pyaar se pahle lekin 'zākir' pyaar ke ba.ad
qismat rekhā husn-o-adā aur nāz-o-jafā sab jaan liyā

husn kī daulat us kī hai aur vasl kī ishrat bhī us kī
jis ne pal pal hijr meñ kaaTā jaur sahe dukh jhele haiñ

husn kī shaah talavvun udhar ik āfat-e-jān
vāhime dil ke udhar tafarqe parvāz judā

ishq ishq ho shāyad husn meñ fanā ho kar
intihā huī ġham kī dil kī ibtidā ho kar

jitnā dekho use thaktī nahīñ āñkheñ varna
ḳhatm ho jaatā hai har husn kahānī kī tarah

phir havā-e-ishq se āshuftagī ḳhūbāñ meñ hai
in dinoñ meñ husn bhī āzār jaisā ho gayā

ġhazab kā husn hai ārā.isheñ qayāmat kī
ayaañ hai qudrat-e-parvardigār eid ke din

maiñ aise husn-e-zan ko ḳhudā māntā nahīñ
aahoñ ke ehtijāj se jo māvarā rahe

na vo nuqūsh na husn-e-kashish kī baat rahī
sanam-farosh bhī jaise ḳhudā-parast lage

aap hairāñ hogā apne husn kā
ā.īne meñ gar vo sūrat dekh lī