Tags-Husn

hamīñ se pūchh lo kaise ho tum aur husn kaisā hai
agar ā.īne ko dam bhar na dekhoge to kyā hogā

chhiḌī thiiñ husn kī bahseñ idhar chāñd aur idhar tum the
kisī ko dekh kar be-parda koī chhup gayā hogā

yārab kare jo husn kī ḳhairāt vo sanam
mere sivā kare nahīñ daan aur kī taraf

nigāh-e-husn ḳharīdāriyoñ pe maa.il hai
matā-e-shauq kī arzāniyoñ ke din aa.e

na husn o ishq ne paa.ī amaañ qahr-e-ilāhī se
dabī pādāsh amīrī se faqīrī se na shāhī se

panāheñ husn ne pā.īñ siyahkārī ke dāman meñ
vafādārī huī rū-posh nādārī ke dāman meñ

agar ā.īna-e-dil saaf ho husn-e-tavajjoh se
har ik āñkhoñ kā parda parda-e-asrār ban jaa.e

dam le rahī thiiñ husn kī jab sehr-kāriyāñ
in vaqfa-hā-e-kufr ko īmāñ banā diyā

phir dekhnā nigāh laḌī kis se ishq kī
gar husn ne hijāb-e-taġhāful uThā diyā

baḌhtā hī jā rahā hai jamāl-e-nazar-fareb
husn-e-nazar ko husn-e-ḳhud-ārā banā diyā

ik barq-e-be-qarār thī tamkīn-e-husn bhī
jis vaqt ishq ko ġham-e-sabr-āzmā diyā

jaan detā huuñ abhī ishq ke andāz pe maiñ
husn hogā mire pahlū meñ ġhazal-ḳhvāñ ik roz

bāñhoñ meñ simaT ke husn terā
kuchh der niDhāl bhī rahegā

ahl-e-ulfat ke liye husn-e-ravāñ hai urdu
ahl-e-dil ke liye dilkash hai javāñ hai urdu

amīn-e-husn jahāñ-tāb hai tirī hastī
jahāñ meñ puḳhtagī-e-ishq-e-ḳhām paidā kar

mirī ārzūoñ ke ḳhvāb the ki fazā-e-husn-o-shabāb the
kahīñ nik.hatoñ meñ bikhar ga.e kahīñ rañg-o-nūr meñ Dhal ga.e

ye dayār-e-shauq hai ham-nashīñ yahāñ laġhzishoñ meñ bhī husn hai
jo miTe vo aur ubhar ga.e jo gire vo aur sambhal ga.e

ba-qadr-e-zauq-e-nazar dīd-e-husn kyā ho magar
nigāh-e-shauq meñ jalve samā.e haiñ kyā kyā

tamām husn ke jalve tamām mahrūmī
bharam nigāh ne apne gañvā.e haiñ kyā kyā

payām-e-husn payām-e-junūñ payām-e-fanā
tirī nigah ne fasāne sunā.e haiñ kyā kyā