Tags-Husn

husn sarshārī-e-andāz-o-adā se guzrā
aur sab ahl-e-vafā rasm-e-vafā bhuul ga.e

nazar uThāo to har taraf hai bahisht-e-husn-o-jamāl lekin
kahāñ vo andāz us kā lahja shabāhateñ ḳhadd-o-ḳhāl kī haiñ

kisī kā yuuñ to huā kaun umr bhar phir bhī
ye husn o ishq to dhokā hai sab magar phir bhī

tum husn kī ḳhud ik duniyā ho shāyad ye tumheñ mālūm nahīñ
mahfil meñ tumhāre aane se har chiiz pe nuur aa jaatā hai

us ke sharār-e-husn ne sho.ala jo ik dikhā diyā
tuur ko sar se paañv tak phūñk diyā jalā diyā

tum jis ko samajhte ho ki hai husn tumhārā
mujh ko to vo apnī hī mohabbat nazar aa.ī

āḳhirash saare chaman ko de ke husn-e-zindagī
maut ke bistar pe har ġhuncha mahak kar so gayā

kuchh us kā husn thā kuchh zevaroñ kī zebā.ish
ye ḳhvāb thā use dekhe hue zamāna huā

ham ahl-e-dil bhī agar fikr-e-jān-o-tan karte
to log husn pe iz.hār-e-husn-e-zan karte

hai vo ārā.ish-e-husn-e-bātin
jis ko kahte haiñ jamāl-e-tahzīb

the vo husn-o-ishq ke rāz-o-niyāz
qaid zindāñ meñ mah-e-kan.āñ rahe

aisā to na kar pā.egā koī bhī fusūñ-kār
vo kar ga.e jo sādgī-e-husn-e-nazar se

majbūr-e-numā.ish nahīñ kuchh husn hī un kā
ham bhī to haiñ majbūr taqāzā-e-nazar se

nasīm-e-sub.h se shāḳheñ milīñ to maiñ samjhā
ki husn-e-ālam tiflī meñ nīm-ḳhvāb uThā

zevar-e-taḳhayyul aur
husn-e-guftugū hai tū

ab kyā kareñ ki husn jahāñ hai aziiz hai
tere sivā kisī pe na pyaar aa.e ye nahīñ

vaj.h-e-sukūñ na ban sakīñ husn kī dil-navāziyāñ
baḌh ga.iiñ aur uljhaneñ tum ne jo muskurā diyā

ye to mumkin hī nahīñ husn kā faizān na ho
ishq ne husn ko armān banā rakkhā hai

muqābil husn jab aa.e sitam-zādoñ kī mahfil meñ
zabāñ ko qaid karnā hai nazar se baat karnī hai

is husn-e-be-karāñ ko ḳhudā āgahī bhī de
dariyā diyā hai is ko to dariyā-dilī bhī de