Tags-Husn

jo pūchhe ittihād-e-husn-o-ishq us ko nazar aave
ki niklā baiza-e-ġhuncha se bulbul jis ko kahte haiñ

ātish-e-husn javānān-e-chaman bhaḌkā de
jo gul-e-surḳh kī pattī ho vo chiñgārī ho

kal kā.enāt-e-husn nahīñ husn-e-kā.enāt
ruḳh aur bhī haiñ jalva-e-zer-e-naqāb ke

hazār baar luTā husn-e-barg-o-bār magar
rag-e-shajar meñ ravāñ mauj-e-rañg-o-bū hī rahī

maiñ batā.ūñ vā.iz-e-ḳhush-navā hai jahān-o-ḳhuld meñ farq kyā
ye agar fareb-e-ḳhayāl hai vo fareb-e-husn-e-ḳhayāl hai

is adā se kaun ye jalva-gar sar-e-bazm-e-husn-e-ḳhayāl hai
jo nafas hai mast-e-bahār hai jo nazar hai ġharq-e-jamāl hai

hai tere sheroñ meñ kuchh aisī ḳhush-gumānī 'tūr'
bayān-e-husn hai husn-e-bayāñ ajiib sā kuchh

maah ke siine upar ai sham.a-rū
daaġh hai tujh husn kī jhalkār kā

ab bhī mazāq-e-dard se merī shaboñ meñ hai gudāz
mere laboñ pe aaj bhī naġhma-e-husn-e-yār hai

agar hai husn kā da.avā mah o ḳhurshīd donoñ meñ
kaf-e-pā se tumhāre muñh milā le jis kā jī chāhe

zindagī ke ḳhāka-e-sāda ko rañgīñ kar diyā
husn kaam aa.e na aa.e ishq kaam aa hī gayā

ham tum sā hasīñ kaise kaheñ shams-o-qamar ko
har husn ko to husn-e-sarāpā nahīñ kahte

kartā hai shauq-e-dil ke evaz mol husn kā
dallāl boltā hai ḳharīdār kī taraf

kahīñ chhupā.e se chhuptā hai laal gudḌī meñ
faroġh-e-husn tujhe be-naqāb kar degā

na dekhnā kabhī ā.īna bhuul kar dekho
tumhāre husn kā paidā javāb kar degā

yuuñ sar-e-mahfil vaqār-e-husn ko rusvā na kar
us kā dāman thaam le apnā garebāñ chhoḌ kar

lāla-o-gul meñ ayaañ haiñ husn-e-fitrat ke rumūz
mutma.in huuñ ishq meñ dasht-o-bayābāñ chhoḌ kar

mujh ko shauq-e-husn meñ tahzīb hāzir chāhiye
gulistāñ meñ aa gayā huuñ maiñ bayābāñ chhoḌ kar

maiñ talāsh-e-husn se aisā huā huuñ munsalik
jā rahā huuñ zindagī kā sāz-o-sāmāñ chhoḌ kar

surḳh āñkheñ ghumāte hue bheḌiye raat kā husn haiñ
sarsarāte hue shāḳhchoñ meñ chhupe māñda panchhī