Tags-Husn

husn chhuptā phir rahā hai muḳhtalif pardoñ meñ 'kaif'
ishq kī zālim nazar ke sāmne kaun aa.e hai

rahm kar jazb-e-mohabbat ye sitam kyoñ Dhaa.e hai
husn aur betāb-o-hairāñ kis se dekhā jaa.e hai

har adā-e-husn par hotā thā dil jab be-qarār
jab rahā kartā mulāqātoñ kā bāham intizār

mirā dil alag hai bujhā sā kuchh tire husn par bhī chamak nahīñ
kabhī ek markaz-e-zīst par unheñ saath lā ke bhī dekh le

ab to darindagī kī naash bhī husn hai
dīvār par sajāte haiñ sar kaaT kaaT ke

ishq ne husn kī be-dād pe ronā chāhā
tuḳhm-e-ehsās-e-vafā sañg meñ bonā chāhā

aa.ina dekh kar vo ye samjhe
mil gayā husn-e-be-misāl hameñ

ġhamza-e-jāñ-setāñ ma.āz-allāh
shoḳhī-e-husn-e-yār ne maarā

baras rahī hai harīm-e-havas meñ daulat-e-husn
gadā-e-ishq ke kaase meñ ik nazar bhī nahīñ

husn kā āġhosh-e-rañgīñ dil-fareb-o-dilrubā
ilm se ban jaa.e aqlīdas kā mahz ik dā.era!

hech hai har chiiz zevar ġhāza afshāñ rañg o ḳhaal
husn ḳhud apnī jagah hai sau kamāloñ kā kamāl

jis jagah hūrān-e-jannat kā kiyā hai tazkira
kyā kahā hai aur bhī kuchh ham ne juz husn o hayā

duur hī se aise ilm-e-jahl-parvar ko salām
husn-e-nisvāñ ko banā detā ho jo jāgīr-e-ām

husn ho jā.egā jab auroñ kā vaqf-e-ḳhās-o-ām
dīdanī hogā tire ḳhalvat-kade kā ehtimām

husn par fir.aun kī phabtī kahī
haath laanā yaar kyuuñ kaisī kahī

ghul jaa.e sher meñ to zamīñ āsmāñ bane
vo husn-e-lā-zavāl jo sachchā.iyoñ meñ hai

nigāh-e-husn ne tartīb ulTī kar Daalī
ki tiir niklā nazar se kamāñ pe pahuñchā hai

jab chhā.ī ghaTā lahrā.ī dhanak ik husn-e-mukammal yaad aayā
un hāthoñ kī mehñdī yaad aa.ī un āñkhoñ kā kājal yaad aayā

ek hī anjām hai ai dost husn o ishq kā
sham.a bhī bujhtī hai parvānoñ ke jal jaane ke ba.ad

vo be-parda bhī parda-posh-e-nazar hai
hijāb aa gayā hai hameñ husn-e-zan kā