Tags-Husn

hai ahl-e-bazm ye bhī ik andāz-e-nāz-e-husn
aañsū kahāñ se sham-e-farozāñ meñ aa ga.e

har ḳhaar bul-havas ke kiye sohbat iḳhtiyār
to husn gul-ruḳhoñ meñ latāfat nahīñ rahī

husn to puurā adhūre-pan meñ hai
sab adhūre māh-e-kāmil ho ga.e

in rozoñ lutf-e-husn hai aao to baat hai
do din kī chāñdnī hai phir añdhiyārī raat hai

ab husn ke mizāj se vāqif huā huuñ maiñ
ik bhuul thī jo tum se kahā thā vafā karo

ālam-e-husn hai vo naqsh-e-ma.ānī 'sāqib'
jo mirī tab-e-ḳhudā-dād ne ījād kiyā

husn-e-jāñ-soz ne vahdat meñ mujhe yaad kiyā
maiñ ye samjhā ki mujhe ishq ne barbād kiyā

na ab vo jalva-e-yūsuf na misr kā bāzār
na ab vo husn ke tevar, na ab vo dīvāne

halke se husn-e-tabassum kā bhī andāza huā
bojh saare din kā le kar jab maiñ apne ghar gayā

husn kī dhuup meñ nikhrā huā phūloñ sā badan
dil ke luT jaane kā is ko hī sabab kahte haiñ

zohar-e-āshiqī se Dartā huuñ
husn kī barhamī se Dartā huuñ

hairān bahut tābish-e-husn-dīgarāñ thī
tujh lab kī sifat lāl-e-badaḳhshāñ meñ kahāñ thī

huā dhuup meñ bhī na kam husn-e-yār
kanhayyā bane vo jo sañvlā ga.e

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

jab tak tumhārā husn numāyāñ na ho sakā
raushan charāġh-e-ālam-e-imkān na ho sakā

tābānī-e-husn-e-ālam hai garmi-e-mohabbat ke dam se
parvāne agar mahfil meñ na hoñ phir sham.a kā jalnā mushkil hai

pur hai bāzār-e-husn chehroñ se
jaane kis kis kī aabrū hai yahāñ

sitāra-e-falak-e-husn kahiye kam-sin hai
abhī vo chāñd kā TukḌā mah-e-tamām nahīñ

do-ālam jalva-gāh-e-husn meñ ain-e-basīrat meñ
ye aks-e-shaḳhs hai ā.īne meñ sūrat-numā kyā hai

ḳhud ishq kī gustāḳhī sab tujh ko sikhā degī
ai husn-e-hayā-parvar shoḳhī bhī sharārat bhī