Tags-Husn

intihā par ishq aa kar ho gayā hai ain husn
maut kī bhī aañkh paḌtī hai tire bīmār par

vo mel-jol husn o basīrat meñ ab kahāñ
jo silsila thā phuul kā patthar se kaT gayā

kyuuñ mizāj-e-husn meñ paidā kareñ ik barhamī
apne dil ko apnā afsāna sunā lete haiñ ham

na milā kar udaas logoñ se
husn terā bikhar na jaa.e kahīñ

ishq ke ijz-o-niyāz husn ke andāz-o-nāz
koī ise kuchh kaho ham to samajhte haiñ ḳhvāb

sehn-e-chaman husn-e-gul abr-o-havā sharb-e-mul
koī ise kuchh kaho ham to samajhte haiñ ḳhvāb

allāh ne kiyā hai kise bādshāh-e-husn
sar par hai kis ke zill-e-humā kuchh na pūchhiye

kis ko hisār-e-husn kahūñ maiñ kis ko ḳhat-e-parkār kahe dil
muñh se ulaT burqā ko dikhā do kaan kā baalā zulf kā halqa

ġharq na kar dikhlā kar dil ko kaan kā baalā zulf kā halqa
bahr-e-husn ke haiñ ye bhañvar do kaan kā baalā zulf kā halqa

ḳhudā ne husn diyā hai tujhe kamāl magar
use sajāne kā tujh ko hunar bhī aatā hai

badan kā husn damaktā hai raat añdhere meñ
ik āftāb-e-sahar be-sahar bhī aatā hai

husn kā dekhne vaalā koī baaqī na rahā
kis se karte ho tum ab sharm-o-hayā mere ba.ad

chashm-e-junūñ meñ husn-e-salāsil hai be-qarār
kis kī galī meñ jashn-e-garebāñ manā.eñ ham

zarā ā.īna dekh o husn vaale
batā de mirā pyaar kitnā hasīñ hai

har sitāre kī chamak nūr-e-jahān-e-husn hai
rakhtī haiñ hukm-e-jahāñgīrī tumhārī chūḌiyāñ

yaad rakh har dam ḳhudā ko paas rakh husn-e-vafā
saḳht rakh diiñ ko mudām aur jam.a kar ilm ai javāñ

ham apnā ishq chamkā.eñ tum apnā husn chamkāo
ki hairāñ dekh kar aalam hameñ bhī ho tumheñ bhī ho

mudda.ā-e-ishq merā kuchh nahīñ juz zauq-e-ishq
husn ko hairat ki ye kis sa.ī-e-be-hāsil meñ hai

ishq-e-ġhārat-gar ne shah dī husn-e-āfat-ḳhez ko
shauq-e-bismil hī se kas-bal bāzū-e-qātil meñ hai

yuuñ bhī to tirī raah kī dīvār nahīñ haiñ
ham husn-e-talab ishq ke bīmār nahīñ haiñ