Tags-Husn

vo husn baḌī der rahā sāmne mere
phir maiñ ne miyāñ jis tarah chāhā use dekhā

mahrūm rahī sohbat-e-mardān-e-razā se
kis husn kī dahshat thī ki paas aa.ī na duniyā

ho salāmat mirā ishq josh-e-junūñ husn ke raaz ḳhud munkashif ho ga.e
itnī mushkil nahīñ rahguzār-e-fanā be-ḳhudī chāhiye āgāhī ke liye

āshiq se na khīñch aap ko ai bādshah-e-husn
darvesh se kyā jhuk ke tavañgar nahīñ miltā

jhalaktā hai kisī kā husn firdaus-e-nazar ban kar
kisī ke ashk sabze par machalte haiñ guhar ban kar

ishq nā-vāqif-e-ādāb-e-talab hai 'anjum'
husn āmāda-e-iz.hār-e-vafā kaise ho

husn-e-ahmad kā hī atiya hai ye husn-e-duniyā
husn kī itnī farāvānī pe rashk aatā hai

garche hai dil-kushā bahut husn-e-farañg kī bahār
tā.erak-e-buland-bām dāna-o-dām se guzar

husn ho jaatā hai jis lamhe zarūrat kā asiir
ek ho jaate haiñ us dam ḳhair-o-shar ke dā.ere

ham aur rasm-e-bandagī āshuftagī uftādgī
ehsān hai kyā kyā tirā ai husn-e-be-parvā tirā

aah bārgah-e-husn meñ jalvoñ kā asar dekh
had se na guzar zabt meñ ai zabt-e-nazar dekh

qīmat-e-husn-o-adā jaan kī baazī Thahrī
log aa.e the vahāñ dirham-o-dīnār ke saath

tujh husn ke baaġh meñ sirījan
ḳhurshīd gul-e-dopahriyā hai

ham ne aisā na koī dekhne vaalā dekhā
jo ye kah de ki tirā husn sarāpā dekhā

jamāl-o-husn kī vo anjuman meñ kyā baiThe
matā-e-hosh-o-ḳhirad hī ko jo gañvā baiThe

fahm laakh suljhā.e vahm laakh uljhā.e
husn hai haqā.eq kā kyā ḳhayāl mere haiñ

dasht-e-tavahhumāt meñ apnī sadā hai aur ham
husn-e-yaqīñ ke qāfile kis se kaheñ kidhar ga.e

hai āfat-e-jāñ husn kī shoḳhī bhī adā bhī
hoñToñ pe tabassum bhī hai nazroñ meñ hayā bhī

tābish-e-ilm-o-hunar hai be-samar
kāvish-e-husn-e-amal be-sūd hai

ab husn-faroshī ke liye misr ke badle
bhārat meñ hai naḳhḳhās kā bāzār registered