Tags-Husn

tū jafā meñ mast hai roz-o-shab maiñ kafan-ba-dosh o ġhazal-ba-lab
tire ro.ab-e-husn se chup haiñ sab maiñ bhī chup rahūñ to mazā hai kyaa?

mujh se lage haiñ ishq kī azmat ko chaar chāñd
ḳhud husn ko gavāh kiye jā rahā huuñ maiñ

tanqīd-e-husn maslahat-e-ḳhās-e-ishq hai
ye jurm gaah gaah kiye jā rahā huuñ maiñ

bistar-e-mashriq se sūraj ne uThāyā apnā sar
kis ne ye mahfil meñ zikr-e-husn-e-yaktā kar diyā

husn meñ taḳhlīq kā jauhar bhī hai
us ke ''maiñ'' kahne se ''ham'' paidā huā

husn vāloñ ko zid aa jaa.e ḳhudā ye na kare
kar guzarte haiñ jo kuchh jī meñ Thanī hotī hai

faroġh-e-husn salāmat kahīñ to hogī sahar
ki shab hai gesu-e-mushkīñ tatār kī had tak

husn ko shakleñ dikhānī aa ga.iiñ
shoḳhiyāñ le kar javānī aa ga.iiñ

hai husn kā naam muft badnām
log apnī talab meñ mar rahe haiñ

maiñ tirī saltanat-e-husn kā bāshinda huuñ
mujh ko duniyā meñ kahīñ aur nahīñ rahnā hai

vo kitāb-e-husn vo ilm o adab kī tāliba
vo mohazzab vo muaddab vo muqaddas rāhiba

gudāz āhan-diloñ ko husn jab de
na hove aab kyūñkar sañg-e-ḳhārā

ye fusūn-e-rū-e-lailā ba-azāb-e-jān-e-majnūñ
vahī husn-e-dasht-o-dar hai ba-tavāf-e-jāñ-nisārāñ

kab tak dimāġh-e-husn kī naḳhvat na jā.egī
aise to rā.egāñ ye aqīdat na jā.egī

husn ko ye ġham ki jalve ho rahe haiñ be-naqāb
ishq ko ye fikr nāmūs-e-nazar rusvā na ho

husn un kā agar hai sañgīñ-dil
ishq apnā bhī saḳht baazū hai

zāhido vird-vazā.if se nahīñ hāsil-e-kār
jis ko ho husn-e-ijābat vo duā aur hī hai

maiñ jū-e-nishāt-o-ġham huuñ koh-o-bāġh-o-sahrā meñ
ki maarā hijr kā thā husn kā maarā na thā pahle

husn ke vasvase se bāhar mil
tū mujhe aa.ine se bāhar mil

vo apne husn kī ḳhairāt dene vaale haiñ
tamām jism ko kaasa banā ke chalnā hai