Tags-Husn

husn-e-ḳhūbāñ hilāl-o-badr kī tarah
kabhī kam hai kabhī ziyāda hai

husn-e-ijmāl meñ tafsīr ke pahlū haiñ bahut
kuchh ziyāda bhī agar likhnā ho to kam likheñ

husn-o-ishq judā hote haiñ jaane kyā tūfān uThegā
husn kī āñkheñ bhī haiñ pur-nam ishq kī āñkheñ bhī haiñ pur-nam

kuchh bhī ho par in āñkhoñ ne akasr ye aalam bhī dekhā
ishq kī duniyā nāz-e-sarāpā husn kī duniyā ijz-e-mujassam

na dekhūñ kis tarah husn-e-ḳhudā-dād un hasīnoñ kā
bhalā un zāhidoñ kī tarah kaun āñkhoñ kā andhā ho

tum apne husn kī kyā bul-havas se daad pāoge
use pūchho mire dil se ki tum kyā chiiz ho kyā ho

ḳhayāl-e-husn meñ yuuñ zindagī tamām huī
hasīn sub.h huī aur hasīn shaam huī

yuuñ to bayāñ us husn kā karnā thā dushvār
aayā mire ash.ār meñ kuchh pahlū ban kar

partav-e-husn se zarre bhī bane ā.īne
kitne jalve kiye arzāñ tirī ra.anā.ī ne

husn ke zer-e-bār ho ki na ho
ab ye dil be-qarār ho ki na ho

shauq thā shabāb kā husn par nazar ga.ī
luT ke tab ḳhabar huī zindagī kidhar ga.ī

zindagī se uns hai
husn se lagāv hai

husn un ko ye raa.e detā hai
kaam ummīd ke ḳhilāf karo

hai jā-e-husn hayā aur bhī izāfa kar
nazar ke sāmne aa jā nazar jhukā.e hue

husn kī tāvīl meñ bas itnī tabdīlī huī
TaaT kā TukḌā tire shānoñ pe maḳhmal ho gayā

ham ne husn-e-adā kahā is ko
jab kabhī tū ne kaj-adā.ī kī

husn ke jalve luTā.e tirī ra.anā.ī ne
raaz sab khol diye ek hī añgḌā.ī ne

anjum se baḌh ke terā har zarra zau-fishāñ hai
jalvoñ se tere ab tak husn-e-azal ayaañ hai

yaad kar vo din ki terā koī saudā.ī na thā
bāvajūd-e-husn tū āgāh-e-rānā.ī na thā

kyā hue vo din ki mahv-e-ārzū the husn o ishq
rabt thā donoñ meñ go rabt-e-shanāsā.ī na thā